Кіраўнік Y Combinator: бізнес-школы вучаць хлусіць інвестарам — гэта просты шлях у вязніцу

На канферэнцыі AI Startup School Тан рэзка раскрытыкаваў універсітэцкія бізнес-праграмы, якія, на яго думку, «ператвараюць стартап-адукацыю ў сімуляцыю», а студэнтаў вучаць скажаць праўду дзеля поспеху.

«Мяне вельмі турбуе тое, што іх фактычна вучаць, як хлусіць інвестарам. Навошта хлусіць, калі праграмнае забеспячэнне — гэта і так самы магутны інструмент у свеце?», — заявіў ён.

Y Combinator — адзін з самых вядомых акселератараў у свеце, партнёрамі якога сталі Airbnb, Dropbox і DoorDash. Тан адзначыў, што ў адрозненне ад рэальнага свету стартапаў, універсітэцкія курсы часта ствараюцца не заснавальнікамі, а тэарэтыкамі.

«Калі прадпрымальніцтва ўпакоўваюць у курс — атрымліваецца танная падробка. Методыкі не працуюць ва ўмовах рэальнага хаосу і няпэўнасці», — дадаў кіруючы дырэктар YC Джарэд Фрыдман, сузаснавальнік Scribd.

У сваёй прамове Тан нагадаў пра сумна вядомых прадпрымальнікаў, такіх як Сэм Бэнкман-Фрыд (FTX) і Элізабет Холмс (Theranos), якія ў выніку атрымалі рэальныя тэрміны — 25 і 11 гадоў — за ўвядзенне ў зман інвестараў і кліентаў. «Гэта не шлях да поспеху. Гэта шлях у турму», — дадаў Тан.