Google і Amazon не могуць звольніць супрацоўнікаў у Еўропе праз мясцовыя законы

Тысячы ІТ-спецыялістаў у некаторых краінах цяпер знаходзяцца ў падвешаным стане і не ведаюць, як іх закрануць перамовы, якія могуць доўжыцца бясконца. Напрыклад, у Францыі Alphabet спрабуе ўгаварыць супрацоўнікаў сыходзіць на ўласнае жаданне і адкупіцца шчодрымі выходнымі дапамогамі.

У Францыі і Германіі працоўнае заканадаўства адное з найстражэйшых у рэгіёне. Кампаніі абавязаныя ўзгадняць масавыя звальненні з працоўнымі саветамі — гэта органы, якія складаюцца з абіраных працаўнікоў і ствараюцца для абмеркавання працоўных момантаў паміж імі і кіраўніцтвам — у прыватнасці, таго, колькі спецыялістаў і якіх можна звольніць. Гэта працяглы працэс, які патрабуе збору інфармацыі, дыялогу і не факт, што скончыцца на карысць кампаніі.

Таму, адзначаюць крыніцы Bloomberg, звальненні калі і закрануць офісы Google у гэтых дзвюх краінах, то ў самую апошнюю чаргу. Прадстаўнік Google пацвердзіў выданню, што перамовы сапраўды вядуцца, і дадаў, што кампанія не плануе скарачаць у Румыніі, Грэцыі і Аўстрыі. Кожная юрысдыкцыя прапрацоўваецца ў індывідуальным парадку.

Крыніцы Bloomberg кажуць, што перамовы Google у Парыжы могуць заняць тыдні, а праца тым часам будзе працягвацца ў штатным рэжыме. Мясцовы менеджмент, паводле слоў супрацоўнікаў, даў зразумець, што «сыходзіць» сілком нікога не будуць.

У Вялікабрытаніі ўмовы спрыяльнейшыя для Google — тут яна зможа звольніць каля 500 чалавек. Прадметам перамоў з’яўляецца выхадная дапамога, але не колькасць тых, каго звальняюць. У прафсаюзах кажуць, што кампанія спрабуе звесці выплаты да дапушчальнага мінімуму. У Дубліне будзе звольнена 240 чалавек, яшчэ 200 — у Цюрыху.

Еўрапейскія прафсаюзы нават сфармавалі міжнародны працоўны савет для супрацоўнікаў Google у краінах ЕС (у яго таксама ўваходзяць Брытанія і Швейцарыя). Ён будзе базавацца ў Дубліне і запрацуе праз 6 месяцаў. Сябры савета будуць абірацца на 4 гады і адстойваць інтарэсы працаўнікоў.

Amazon у Францыі ўгаворвае некаторых старэйшых менеджараў з 5-8 гадамі досведу звольніцца ў абмен на дапамогу памерам аж да гадавога акладу, а тых супрацоўнікаў, хто пагадзіўся сысці, адпраўляюць у «прымусовы адпачынак» да мая, каб яны маглі дачакацца вестынгу сваіх акцый і атрымаць гэтыя бонусы. У ранейшыя гады дапамога складала адзін аклад за кожны год працы. Такая схема цяпер дзейнічае для супрацоўнікаў, якія звальняюцца ў Люксембургу, але яны яшчэ атрымліваюць дадатковыя выплаты паводле мясцовых законаў. У Германіі Amazon звальняе супрацоўнікаў на выпрабавальным тэрміне, але прапануе заахвочванні за сыход «па-добраму». У Amazon ад каментароў адмовіліся.

Тры амерыканскія тэхнагіганты — Amazon, Alphabet і Meta — сумарна налічваюць у Еўропе і Вялікабрытаніі больш за 170 тысяч штатных супрацоўнікаў. Мясцовыя распрацоўшчыкі софту часцяком зарабляюць тут удвая менш, ніж іх заакіянскія калегі.