ШІ-інструмент для кодэраў, ШІ-агент, генератары малюнкаў і відэа: галоўныя анонсы Google I/O 2025

Gemini Ultra і Deep Think

Google прэзентавала Gemini Ultra, прэміяльную падпіску за $249,99 у месяц, якая пакуль працуе толькі ў ЗША. Яна дае доступ да перадавых ШІ-аплікацый, уключаючы генератар відэа Veo 3, аплікацыю для рэдагавання відэа Flow і рэжым Deep Think у мадэлі Gemini 2.5 Pro.

Deep Think — гэта палепшаны рэжым разважання, які разглядае некалькі гіпотэз перад тым, як даць адказ, павышаючы дакладнасць у складаных задачах, такіх як матэматыка і праграмаванне. Пакуль ён даступны толькі давераным тэстарам праз Gemini API, бо Google праводзіць дадатковыя праверкі бяспекі.

Veo 3 і Imagen 4

Veo 3, новая мадэль генерацыі відэа, здольная ствараць гукавыя эфекты, фонавы шум і нават дыялогі, сінхранізаваныя з відэа. Паводле распрацоўшчыкаў, якасць відэа ў новай мадэлі значна вышэйшая ў параўнанні з Veo 2. Мадэль даступная падпісчыкам Gemini Ultra у дадатках Gemini, Flow і Vertex AI.

Flow — гэта інструмент для стварэння фільмаў з дапамогай Veo 3. Карыстальнікі могуць імпартаваць выявы сцэны або персанажаў ці генераваць іх па тэкставым промпце. Даступна некалькі функцый: напрыклад, кіраванне камерай і Scenebuilder, які дазваляе рэдагаваць кадры. Flow даступны ў тарыфных планах Google AI Pro ($19,99 у месяц) і Google AI Ultra. Падпісчыкі Pro атрымаюць 100 генерацый у месяц. Для Ultra ліміт пакуль не вызначаны.

Imagen 4, абноўлены генератар малюнкаў, забяспечвае высокую дэталізацыю (напрыклад, тэкстуры тканін ці кроплі вады) і падтрымлівае стварэнне малюнкаў у разрозненні да 2K у розных стылях. Генератар даступны ў аплікацыях Gemini, Whisk, Vertex AI і Workspace.

Project Mariner

Project Mariner — ШІ-агент, які самастойна ўзаемадзейнічае з вэб-сайтамі, цяпер выконвае да 10 задач адначасова, напрыклад, набыццё квіткоў або заказ прадуктаў. Інструмент даступны падпісчыкам AI Ultra і працуе ў воблаку, дазваляючы карыстальнікам займацца іншымі справамі, пакуль ШІ выконвае запыты. Неўзабаве функцыянал стане даступны ў Google Search праз AI Mode і API для распрацоўшчыкаў. Agent Mode у аплікацыі Gemini дазваляе дэлегаваць задачы, напрыклад, пошук жылля з выкарыстаннем дадзеных з сайтаў кшталту Zillow. Абедзве функцыі стануць шырэй даступнымі летам гэтага года.

Project Astra і Search Live

Project Astra, мультамадальны ШІ з нізкай затрымкай, інтэграваны ў Google Search, Gemini і прадукты пабочных распрацоўшчыкаў. Інструмент забяспечвае інтэрактыўныя магчымасці, такія як Search Live: карыстальнікі могуць задаваць пытанні ў рэальным часе з дапамогай камеры смартфона. Astra таксама падтрымлівае будучыя разумныя акуляры, што распрацоўваюцца разам з партнёрамі, уключаючы Samsung і Warby Parker, і новыя функцыі, напрыклад, аўтаматычнае распазнаванне памылак, хоць дата іх запуску пакуль не абвешчаная.

Абнаўленні Google Search

AI Mode, эксперыментальная функцыя пошуку, цяпер даступная ўсім карыстальнікам у ЗША. Яна дазваляе задаваць складаныя шматэтапныя пытанні, а новая функцыя Deep Search выконвае сотні запытаў для стварэння падрабязных справаздач. У хуткім часе AI Mode дадасць падтрымку складаных дадзеных пра спорт і фінансы, а таксама магчымасць віртуальнай прымеркі адзення з разуменнем 3D-форм і тэкстур тканін.

Android Studio

Android Studio атрымала некалькі ШІ-функцый, уключаючы Journeys, якая дазваляе тэставаць аплікацыі з дапамогай апісанняў на натуральнай мове, і Agent Mode для выканання складаных задач распрацоўкі, такіх як інтэграцыя API. Палепшаная панэль App Quality Insights цяпер аналізуе зыходны код, каб выяўляць прычыны збояў і прапануе выпраўленні. Таксама прэзентаваны Android Studio Cloud для распрацоўкі праз браўзер.

Google Play

Сярод ключавых анонсаў для Google Play: шматпрадуктовая падпіска, якая дазваляе прадаваць дадатковыя паслугі разам з асноўнымі падпіскамі ў адным плацяжы, што спрашчае кіраванне і скарачае адток карыстальнікаў на 3%. Таксама з’явіліся тэматычныя старонкі (пакуль толькі ў ЗША), якія злучаюць карыстальнікаў з аплікацыямі для прагляду фільмаў і шоу; аўдыясэмплы на галоўнай старонцы крамы, што павялічваюць колькасць усталяванняў да трох разоў; магчымасць прыпыняць рэлізы пры выяўленні праблем. Распрацоўшчыкі прэзентавалі ўзмоцненую абарону праз Play Integrity API, якая змагаецца з махлярствам і павышае бяспеку прылад.

Stitch і Jules

Google прэзентавала два ШІ-інструменты для распрацоўшчыкаў: Stitch і Jules, якія спрашчаюць стварэнне алпікацый і напісанне кода. Stitch — эксперыментальны інструмент з Google Labs, які выкарыстоўвае Gemini 2.5 Pro для генерацыі інтэрфейсаў вэб- і мабільных аплікацый з тэкставых апісанняў або малюнкаў (напрыклад, эскізаў або скрыншотаў). Ён стварае HTML/CSS-код, падтрымлівае налады тэм і экспарт у Figma, паскараючы пераход ад дызайну да распрацоўкі.

Jules — ШІ-агент для праграмістаў, які працуе з GitHub-рэпазіторыямі на воблачных віртуальных машынах. Ён аўтаматызуе задачы, такія як выпраўленне памылак, напісанне тэстаў, абнаўленне залежнасцей і стварэнне новых функцый, забяспечваючы прыватнасць кода і празрыстасць праз планы дзеянняў. Абодва інструменты, даступныя праз Google Labs, дэманструюць пераход Google да «агентнай распрацоўкі», што спрашчае працэсы для дызайнераў і праграмістаў.

Смарт-акуляры Project Aura

Google і Xreal прэзентавалі Project Aura — першыя смарт-акуляры на платформе Android XR, якія вяртаюць кампанію ў сегмент разумных акуляраў пасля Google Glass. Гэта лёгкія, падлучаныя да смартфона акуляры з аптычным празрыстым дысплеем (OST), што выкарыстоўваюць чыпы Qualcomm Snapdragon XR і інтэгруюць ШІ Gemini для інтуітыўнага ўзаемадзеяння, уключаючы навігацыю, пераклад у рэальным часе і доступ да аплікацый Google Play. Прылада абсталявана камерамі, мікрафонамі і дынамікамі, арыентавана на распрацоўшчыкаў. Выпуск гаджэта запланаваны на канец года.

Абнаўленні Google Workspace

Gmail атрымаў персаналізаваныя разумныя адказы, што ўлічваюць кантэкст з лістоў і Google Drive, а таксама функцыю ачысткі паштовай скрыні, якая дазваляе масава выдаляць або архіваваць паведамленні. Google Vids цяпер можа пераўтвараць слайды ў відэа, ствараць ШІ-аватары і выдаляць словы-паразіты з аўдыё. У Google Docs з’явілася магчымасць абмежаваць дапамогу ШІ толькі даверанымі крыніцамі.

Beam

Project Starline, тэхналогія 3D-відэасувязі, перайменавана ў Google Beam. Гэтая платформа выкарыстоўвае шэсць камер і дысплей для стварэння рэалістычнага 3D-выявы суразмоўцы, забяспечваючы эфект прысутнасці без неабходнасці выкарыстоўваць VR-акуляры. Google Beam інтэграваны з Google Meet, падтрымлівае пераклад гаворкі ў рэальным часе (пакуль для англійскай і іспанскай) і стане даступны ў офісах з канца 2025 года. Тэхналогія ўжо прайшла тэставанне ў офісах Google і ў партнёрстве з кампаніямі, такімі як Salesforce. Распрацоўшчыкі абяцаюць, што навінка павысіць уцягнутасць і палепшыць успрыманне падчас відэазванкоў.

Іншыя анонсы

• Android 16: Выйшла версія Beta 4.1, поўны рэліз запланаваны на чэрвень 2025 года. Новы дызайн Material 3 Expressive дадае выразныя анімацыі і элементы інтэрфейсу, але яго ўкараненне чакаецца пазней.
• Wear OS 6: Абноўлены інтэрфейс з уніфікаваным шрыфтам, дынамічнай тэмай для Pixel Watch і палепшанай кастамізацыяй аплікацый, уключаючы падтрымку Material 3 Expressive.
• NotebookLM: Запушчана мабільная аплікацыя на базе Gemini 2.5 Flash, з палепшаным аналізам дадзеных і функцыяй Video Overviews для стварэння аглядаў на аснове відэа.
• Android XR: Платформа, якая ўпершыню дэбютавала з акулярамі Project Moohan ад Samsung, цяпер пашырана падтрымкай смарт-акуляраў Project Aura і канкуруе з Apple Vision Pro, прапаноўваючы інтэграцыю з Google Play і ШІ Gemini.
• SynthID Detector: Партал для праверкі кантэнту, згенераванага ШІ, з выкарыстаннем вадзяных знакаў SynthID.
• Lyria RealTime: API для генерацыі музыкі ў рэжыме рэальнага часу, даступны для распрацоўшчыкаў.