Google адкрыла доступ да чат-бота Bard карыстальнікам са 180 краін

Раней Bard быў даступны толькі на англійскай мове, цяпер ён атрымаў падтрымку японскай і карэйскай моў. Найбліжэйшым часам Google плануе дадаць падтрымку 40 моў, уключаючы ўкраінскую і рускую. Таксама Bard знае 20 моў праграмавання, здольны тлумачыць сэнс канкрэтнага радка і знаходзіць у кодзе памылкі.

Таксама ў бота з’явяцца новыя функцыі. У дадатак да тэкставага адказу Bard будзе падаваць выявы. Малюнкі можна будзе ўключаць у запыты, і чат-бот зможа іх рэдагаваць. Для рэалізацыі гэтай магчымасці Google дадала Lens у чат-бот. Акрамя таго, у Bard з’явіцца цёмная тэма.

У чат-бота з’явіцца кнопка «Экспарт» — распрацоўшчыкі дададуць магчымасць экспарту і запуску кода з дапамогай Replit, пачынаючы ад мовы Python. Экспартаваць можна будзе і адказы Bard у Gmail і «Дакументы». Магчымасці бота інтэгруюць і ў іншыя сэрвісы Google. Найбліжэйшымі месяцамі ў Bard будзе інтэграваны Adobe Firefly.