Google «усцешаная» тым, што Amazon бачыць у ёй пагрозу

Так, сэйлзам воблачнага сэрвісу AWS загадана пазіцыянаваць як канкурэнтную перавагу над Google і Microsoft тое, што кампанія робіць кастамныя крэмніевыя працэсары і АІ-чыпы. А таксама рабіць акцэнт на абмежаванасці спектру мадэляў, прапанаваных Google.

Google гэта не моцна радуе: «Мы ўсцешаныя тым, што [Amazon] турбуецца пра нас, але выдумка не становіцца фактам проста таму, што хтосьці ў яе верыць», — сказаў прадстаўнік кампаніі ў каментары Business Insider.

Ён дадаў, што АІ-інфраструктура Google забяспечвае найлепшую прадукцыйнасць, бяспеку і суадносіны выдаткаў і эфектыўнасці, а таксама што кампанія прапаноўвае доступ да шырокага спектру AI-мадэляў — больш як 150, уключаючы хатнія, чужыя і оўпэнсорсныя.

Google доўгі час лічылася лідарам у сферы АІ, але потым на рынку з’явіўся чат-бот ChatGPT ад OpenAI, які пахіснуў пазіцыі тэхнагіганта. Amazon дамінуе на рынку воблачных вылічэнняў, але выбухны рост папулярнасці OpenAI вывеў яе наперад у генератыўным АІ. У матэрыялах Amazon для сэйлзаў гаворыцца, што некаторыя кліенты AWS запускалі свае першыя праекты менавіта на тэхналогіі OpenAI, а не AWS.

У Amazon у каментары падкрэслілі, што AWS дае больш сэрвісаў генератыўнага АІ, чым любы іншы воблачны правайдар. І дадалі, што ўсяго толькі хочуць растлумачыць кліентам, што менавіта AWS з’яўляецца самай лепшай, простай і прадукцыйнай платформай для стварэння праграм на аснове генератыўнага АІ.