Інвестары і супрацоўнікі Google сустрэлі рашэнне суда па справе Мін’юста ЗША з палёгкай: кампаніі ўдалося пазбегнуць самых жорсткіх мер. Аднак рашэнні суда могуць у перспектыве сур’ёзна аслабіць пазіцыі Google.
Інвестары і супрацоўнікі Google сустрэлі рашэнне суда па справе Мін’юста ЗША з палёгкай: кампаніі ўдалося пазбегнуць самых жорсткіх мер. Аднак рашэнні суда могуць у перспектыве сур’ёзна аслабіць пазіцыі Google.
Аналітыкі Bernstein адзначаюць, што Google захавала кантроль над ключавымі платформамі Chrome і Android, але страціла права заключаць эксклюзіўныя пагадненні. Гэта адкрывае дарогу канкурэнтам. Так, Apple цяпер зможа перанакіроўваць розныя віды запытаў — ад пошуку аплікацый да лакальных паслуг — да старонніх партнёраў, уключаючы Amazon ці OpenAI.
Найбольш жорсткім аказалася патрабаванне сіндыкацыі. Google павінен будзе перадаваць часткі сваіх вынікаў пошуку і тэкставых аб’яў «кваліфікаваным канкурэнтам» для 40% запытаў на працягу наступных 5 гадоў. Гэта фактычна дае навічкам хуткі доступ да рэкламнай экасістэмы Google і дазваляе ім ствараць параўнальныя пошукавыя прадукты. Аналітыкі адзначаюць, што гэты пункт аказаўся значна суровейшым чым чакалася.
Не менш балючым для Google стала патрабаванне дзяліцца дадзенымі. Канкурэнты атрымаюць разавы здымак пошукавага індэксу — базы, якую кампанія фарміравала дзесяцігоддзямі, а таксама інфармацыю аб кліках і запытах карыстальнікаў як мінімум двойчы. Гэта пазбаўляе Google яе галоўнай перавагі — унікальнай зваротнай сувязі аб тым, якія вынікі выбіраюць карыстальнікі, і магчымасці аператыўна паляпшаць выдачу.
У першую чаргу ад рашэння суда выйграюць Apple і OpenAI, лічаць эксперты. Аналітыкі Wedbush называюць рашэнне «манструознай перамогай для Купертына»: цяпер Apple атрымлівае інструменты для стварэння альтэрнатыўных пошукавых рашэнняў і паскоранага ўкаранення ШІ-сэрвісаў. У кампаніі заявілі, што ўважліва вывучаюць рашэнне і разглядаюць магчымасць апеляцыі.
«Суд абмежаваў спосабы распаўсюджвання сэрвісаў Google і абавязаў дзяліцца дадзенымі пошуку з канкурэнтамі. Мы занепакоены тым, як гэта адаб’ецца на карыстальніках і іх канфідэнцыйнасці», — гаворыцца ў афіцыйнай заяве кампаніі. Суд чакае, што Google і Мін’юст прадставяць узгодненае канчатковае рашэнне да 10 верасня. Канчатковае рашэнне будзе дзейнічаць 6 гадоў і ўступіць у сілу праз 60 дзён пасля зацвярджэння.
Рэлацыраваліся? Цяпер вы можаце каментаваць без верыфікацыі акаўнта.