Памятаеце дрыфт з Тылем Швайгерам ад ІТ-холдынгу? Цяпер каманда скардзіцца, што ім не плацяць

У devby напісалі супрацоўнікі ІТ-групы Blockchain Sports Ecosystem — паскардзіліся на затрымкі заробкаў, якія нібыта выкліканы сыходам асноўнага інвестара.

Мы кінулі кліч — адгукнуліся паўтара дзясятка чалавек з ліку дзеючых і былых супрацоўнікаў Blockchain Sports Ecosystem. Тры з іх спыталі пра прадмет размовы, і заявілі, што ў кампаніі ўсё ў парадку, адзін папрасіў грошай, большасць пацвердзілі затрымкі выплат і фінансавыя праблемы.

Што за Blockchain Sports

ІТ-група Blockchain Sports Ecosystem, згодна з сайтам, мае штаб-кватэру ў Дубаі і тры асноўныя дамены — мотаспорт, дрыфт, футбол.

У Беларусі вядомая каля паўтара года, аб’ядноўвае некалькі каманд/кампаній/юрдычных асоб, у тым ліку рэзідэнта ПВТ X-Labs inc. Займае некалькі (паводле слоў супрацоўнікаў, ад 6 да 10) паверхаў у мінскім БЦ «Футурыс», штат налічвае як мінімум некалькі соцень чалавек. Супрацоўнікі называлі лічбы ад 800 да 1000, улічваючы расійскі офіс — нават больш; на старонцы Blockchain Sports у LinkedIn пазначаны дыяпазон ад 1000 да 5000 чалавек.

Што за прадукты ў сферы блокчэйна і спорту выпускае Blockchain Sports, зразумець няпроста, аднак яшчэ нядаўна ІТ-група была серыйным ньюсмэйкерам.

Так, у лістападзе 2024 года яна прывозіла ў Беларусь акцёра Тыля Швайгера і тыдзень-другі маштабна здымала промаролік — ад Гомеля да Брэста. Памятаеце той самы дрыфт?

У той час CEO Дзмітрый Саксонаў на прэс-канферэнцыі ў Нацыянальным прэс-цэнтры распавядаў, што ІТ-група рыхтуе міжнародны чэмпіянат па дрыфце ў Саудаўскай Аравіі на канец 2025 — пачатак 2026 года.

Тады ж паведамлялася, што X-Labs inc атрымала замову на $180 млн «для стварэння ПЗ на базе ШІ і дапоўненай рэальнасці для бізнесу і спорту», частка грошай мусіла пайсці на распрацоўку вялікага інавацыйнага спартыўнага комплексу ў Саудаўскай Аравіі. Замоўца — уласна Blockchain Sports Ecosystem. Сярод прадуктаў — трэнажор-сімулятар для мотаспорту, аўтапілот на базе ШІ для дрыфтынгу, спартыўныя XR/VR-рашэнні і блокчейн-платформа для захоўвання дадзеных, а таксама нейкая тэхналогія «нейраморфнага ядра».

Хоць ёсць і больш зразумелыя прадукты, напрыклад, мультфільмы ад Arteki Studio, згенераваныя з дапамогай нейрасетак.

У медыя ўсплывалі і іншыя, неадназначныя, дэталі пра бізнес і яго ўдзельнікаў, сувязі з асобамі, блізкімі да дзяржавы.

Што здарылася

Супрацоўнікі распавялі, што не атрымліваюць заробак са студзеня. У асноўным пісалі, што запазычанасць сфармавалася за два поўныя месяцы, хтосьці — што сядзіць без зп ўжо тры месяцы. Адзін чалавек напісаў, што атрымаў аванс у студзені.

Яшчэ два супрацоўнікі сцвярджаюць, што гэта не першая хваля фінансавых праблем. Папярэдняя затрымка нібыта была ў лістападзе, пасля яе на пару месяцаў усё нармалізавалася, і вось ізноў.

Праз адсутнасць грошай, паводле супрацоўнікаў, людзей нават не могуць звольніць: іх няма чым разлічыць. Прычына фінансавых праблем нібыта ў сыходзе інвестара або інвестараў — гэта версія, якую агучвае калектыву кіраўніцтва. Хто тыя інвестары — незразумела: нехта кажа, што з Сербіі, нехта — што з ААЭ. Некаторыя супрацоўнікі сцвярджаюць, што кіраўніцтва заклікае іх далучыцца да пошуку новых інвестараў, іншыя — што інвестар ужо знойдзены і грошы хутка будуць.

Супрацоўнікі ІТ-групы цяжка тлумачылі мадэль манетызацыі іх прадуктаў, яны лічаць, што манетызацыі няма або амаль няма.

«Сябры, мы не кампанія, мы — стартап»

Выбралі некалькі цытат з аповедаў супрацоўнікаў:

— Мы не атрымліваем зарплату са студзеня, абстаноўка сумная. Шмат супрацоўнікаў звальняецца, але не можа зрабіць гэта афіцыйна, бо ў кампаніі няма грошай, а каб звольніць супрацоўніка, трэба з ім разлічыцца. Большасць выпадкаў вырашаюцца ўмоўнымі дамоўленасцямі: вось вам працоўная, а доўг вернем, калі з’явяцца грошы.

— Абяцанні выплаціць даўгі па зп даваліся і пераносіліся некалькі разоў. Па маёй памяці: 3.03, 10.03, цяпер чакаем 20.03 — але ўпэўнены на 99%, што ніякіх грошай не будзе (20 сакавіка мы запыталі абнаўленне — супрацоўнік паведаміў, што выплаты абяцаюць у канцы сакавіка. — devby).

— Кіраўніцтва кажа, што чакаем інвестыцый.

— Змена інвестараў, пошук новых — так нам гэта тлумачаць.

— У кампаніі знікла садавіна, прысмакі і г. д. Раней лядоўні былі поўныя розных напояў, цяпер толькі вада. Барысты пакуль працуюць.

— Сітуацыя ў кампаніі жаласная. Асабіста я тры месяцы без зп, але ў кампаніі ёсць людзі, якія без заробку яшчэ даўжэй.

— У нас даволі шмат стартапаў, але ільвіная доля з іх не манетызуецца, некаторыя праекты нават не выходзілі ў прод.

— Калі ў кампаніі пачаліся праблемы з выплатамі зп, кіраўніцтва адразу сказала: «Сябры, мы не кампанія, мы — стартап». Цяпер пазіцыянуюць сябе толькі так. У кампаніі няма манетызацыі.

— Вельмі шмат праектаў у кампаніі, навошта яны і што з імі — незразумела.

— Зарплату плацяць. Задаволеныя. Абстаноўка добрая.

— З офісам усё ў парадку, па выплатах бываюць перабоі, але некрытычна.

— Абяцаюць, што да канца месяца грошы паступяць на рахунак і ўсё выплацяць.

«Цудоўны офіс, сняданкі, абеды, барыста, макбукі. Нават кальяны былі на балконе»

Мы спыталі некаторых супрацоўнікаў, чаму яны ўладкаваліся ў ІТ-групу, што іх прыцягнула. Адзін адказаў, што атрымаў офер у некалькі разоў большы, чым на мінулым месцы працы. А вось самы падрабязны адказ:

— Я трапіў у кампанію летам [2024], у момант яе росквіту. Акрамя таго, што мяне, як і іншых, прыцягнулі праекты ў цікавых тэхналогіях (блокчейн, AI, Computer Vision), у нас быў добра пракачаны HR-брэнд з усімі плюшкамі.

Калі вакол цябе такое, ствараецца ўстойлівае адчуванне, што наверсе дакладна разумеюць, як працаваць з інвестарамі і грашыма. Але як жа мы памыляліся.

Мы напісалі ў ІТ-групу Blockchain Sports Ecosystem з просьбай пракаментаваць сітуацыю. На працягу двух дзён адказу не атрымалі. Апублікуем каментар, калі ён будзе.