Гуглерам значна паменшылі прыбаўку да зарплаты

У кампенсацыйны пакет уваходзяць аклад, бонус і акцыі. Раз на год пасля правядзення перфоманс-рэв’ю супрацоўнікам паведамляюць, наколькі іх пакеты павялічацца ў наступным годзе.

Паводле слоў аднаго супрацоўніка, на гэты раз прыбаўка была «прыкметна меншай, чым Google прапаноўвала раней». Яму і яго калегам аклад павысілі менш чым на 3%, пры тым што вынікі перфоманс-рэв’ю ў яго добрыя. У мінулыя гады лічба складала 8-10%. То-бок у некаторых прыбаўка ледзь пакрые інфляцыю ў краіне.

Адзін менеджар расказаў, што нават у некаторых супрацоўнікаў з «выбітным» рэйтынгам агульнае ўзнагароджанне стала меншым. Такое магло адбыцца, калі супрацоўніку амаль або ўвогуле не паднялі акладу і прэміяльных, але далі менш акцый, чым раней. Ён растлумачыў, што цяпер у менеджараў папросту менш грошай, якія яны могуць размеркаваць паміж супрацоўнікамі. «Павышэнне акладаў вельмі малое. Самае маленькае, што я бачыў за дзесяць гадоў працы ў Google», — падзяліўся другі менеджар.

Прадстаўніца Google у каментары Business Insider адзначыла, што кампанія скарэктавала выплаты акцыямі ў адпаведнасці з тэмпамі росту і канкурэнтнымі стаўкамі ў розных лакацыях. Яна дадала, што ў большасці супрацоўнікаў Google узнагароджанне павялічыцца.

Гуглеры пры гэтым адзначаюць, што нават калі і павялічыцца, то нашмат менш, чым раней. Аднаму з іх менеджар сказаў, што скарачэнні адлюстроўваюць «новую эканамічную рэальнасць» кампаніі.

Летась у Google прайшлі масавыя скарачэнні. Яшчэ некалькі раўндаў звальненняў яна паспела правесці ўжо сёлета. Кампанія працягвае скарачаць выдаткі і людзей у непрыярытэтных кірунках. Звычайна гуглеры лічацца аднымі з самых высокааплатных работнікаў у ІТ, аднак настрой сярод іх апошнім часам даволі змрочны.