Алеся Чапкевич world 29 снежня 2025, 20:32

HR-стартап наўмысна недаўкамплектоўвае каманды — і лічыць гэта ключом да поспеху

Дырэктар па прадукце HR-стартапа Rippling Мэт МакІніс свядома дае камандам менш людзей, чым, на іх думку, патрэбна для працы. Пра гэта ён распавёў у падкасце Lenny’s.

1 каментарый

HR-стартап наўмысна недаўкамплектоўвае каманды — і лічыць гэта ключом да поспеху

Дырэктар па прадукце HR-стартапа Rippling Мэт МакІніс свядома дае камандам менш людзей, чым, на іх думку, патрэбна для працы. Пра гэта ён распавёў у падкасце Lenny’s.

Паводле словаў МакІніса, запыты на дадатковыя рэсурсы гучаць пастаянна, але ён прынцыповы: «Для мяне важна, каб у нас было адчуванне, што кожны праект у кампаніі свядома ўкамплектаваны меншай колькасцю людзей».

Ён лічыць, што праца на мяжы магчымасцяў адрознівае проста добрыя каманды ад сапраўды моцных. Гатоўнасць працаваць вечарамі і па выходных, калі ўзнікае праблема, і пастаянная высокая нагрузка — частка гэтай логікі. «Трэба пастаянна трымаць рухавік на чырвонай зоне. Як толькі ты аслабляеш хватку, запавольваешся ці расслабляешся, канкурэнты адразу гэтым скарыстаюцца», — кажа МакІніс.

Ён тлумачыць, што калі ў каманд з’яўляецца «прастора, каб бяздзейнічаць», увага рассейваецца, а матывацыя падае. Запавольванне тэмпу, на яго думку, дае канкурэнтам шанс адваяваць долю рынку.

Пры гэтым МакІніс падкрэслівае, што людзей нельга даводзіць да выгарання: «Людзі павінны браць адпачынкі і жыць сваім жыццём. Але арганізацыя ў цэлым не можа расслабляцца. Нельга выпальваць асобных супрацоўнікаў, але каманда як цэлае павінна быць пастаянна сабранай».

Rippling быў заснаваны ў 2017 годзе, у яго ўклаліся фонды Kleiner Perkins, Sequoia Capital, Greenoaks і Y Combinator. У маі кампанія прыцягнула $450 млн, а яе ацэнка дасягнула $16,8 млрд. МакІніс прыйшоў сюды ў 2019 годзе на пазіцыю аперацыйнага дырэктара, а пазней стаў прадуктовым. Да гэтага ён быў сузаснавальнікам і кіраўніком адукацыйнай платформы Inkling, якая была купленая ў 2018-м.

Падыход МакІніса ўпісваецца ў агульны трэнд у Крамянёвай даліне. У апошнія гады тэхналагічныя кампаніі робяць стаўку на хуткі рост і прынцып «рабіць больш меншымі сіламі». Многія скарачаюць менеджараў сярэдняга звяна, спрашчаюць іерархіі, гавораць пра эфектыўнасць і ашчаднасць.

У красавіку CEO Intel Ліп-Бу Тан пісаў, што памер каманды больш не павінен быць ключавым KPI для менеджараў: «Лепшыя лідары робяць больш з меншай колькасцю людзей». Падобную рыторыку выкарыстоўвае Amazon. У пісьме супрацоўнікам у верасні 2024 года гендырэктар Эндзі Джэсі заявіў, што кампанія хоча працаваць «як найбуйнейшы стартап у свеце» — з высокай тэрміновасцю, адказнасцю, хуткімі рашэннямі і жорсткай эканоміяй рэсурсаў. У гэтым кастрычніку Amazon абвесціла пра звальненне 14 тысяч карпаратыўных супрацоўнікаў, спаслаўшыся на хуткае развіццё ШІ.