У Крэмніевай даліне цяпер амаль любое звальненне прынята тлумачыць штучным інтэлектам. Але венчурны інвестар і сузаснавальнік фонду Andreessen Horowitz Марк Андрысен лічыць, што ШІ — толькі зручнае апраўданне, а сапраўдная прычына ў тым, што кампаніі самі раздзьмулі штаты пасля ковіду і цяпер пазбаўляюцца ад лішніх людзей.
У Крэмніевай даліне цяпер амаль любое звальненне прынята тлумачыць штучным інтэлектам. Але венчурны інвестар і сузаснавальнік фонду Andreessen Horowitz Марк Андрысен лічыць, што ШІ — толькі зручнае апраўданне, а сапраўдная прычына ў тым, што кампаніі самі раздзьмулі штаты пасля ковіду і цяпер пазбаўляюцца ад лішніх людзей.
«Па сутнасці, кожная буйная кампанія раздзьмутая. Як мінімум на 25%. Думаю, большасць — на 50%. А многія — на 75%. І цяпер ва ўсіх ёсць ідэальнае апраўданне: ШІ», — сказаў ён у падкасце 20VC.
На ягоную думку, цяпер адбываецца не тэхналагічная рэвалюцыя на рынку працы, а спозненая карэкцыя пасля ковіднага буму. У 2020–2022 гадах тэхнакампаніі масава наймалі, таму што ўсё расло: анлайн-сервісы, электронны гандаль, воблакі, дыстанцыйная праца. Хапалі спецыялістаў «пра запас», будавалі вялікія каманды, нагрувашчвалі пласты менеджменту. Калі рост запаволіўся, аказалася, што людзей нанялі занадта шмат, і пачаліся скарачэнні. Проста цяпер гэта зручна спісваць на ШІ, а не на памылкі ў планаванні. У індустрыі для гэтага нават з’явіўся тэрмін AI washing.
Пры гэтым многія кіраўнікі сапраўды кажуць, што ШІ прывядзе да скарачэнняў. Напрыклад, Джэк Дорсі пасля скарачэнняў у Block наўпрост заявіў, што «большасць кампаніяў спазняюцца» са звальненнямі праз ШІ. Падобныя заявы гучалі ад Meta і Atlassian.
Андрысен жа лічыць размовы пра масавае выцясненне людзей старой эканамічнай памылкай — так званай тэорыяй «фіксаванага аб’ёму працы», быццам у эканоміцы ёсць абмежаваная колькасць задач, і калі машыны робяць больш, людзям застаецца менш.
«Уся гэтая гісторыя пра выцясненне працаўнікоў — на 100% няправільная. Гэта старая памылка пра фіксаваную колькасць працы. Яна заўсёды была няправільнай і зноў акажацца няправільнай», — кажа Андрысен.
Паводле ягонай логіцы, адбываецца іншае: праграмісты, дызайнеры, аналітыкі ўжо выкарыстоўваюць ШІ, і праз гэта іх прадуктыўнасць расце. Але гэта не значыць, што яны становяцца не патрэбныя — гэта значыць, што на іх пачынаюць вешаць больш задач і чакаць большага выніку. ШІ — гэта не столькі спосаб скараціць людзей, колькі спосаб выціснуць з кожнага супрацоўніка больш.
Ён таксама асобна падкрэсліў, што яшчэ зусім нядаўна тэхналогія проста не была на тым узроўні, каб рэальна замяніць людзей у тых ролях, дзе цяпер праходзяць скарачэнні: «ШІ літаральна да снежня быў недастаткова добры, каб выконваць тыя ролі, паводле якіх цяпер ідуць скарачэнні. Так што гэта проста не мог быць ШІ».
Пры гэтым даследаванні паказваюць, што ўплыў ШІ на рынак працы ўсё ж будзе сур’ёзным. Напрыклад, у Anthropic кажуць, што ШІ ўжо тэарэтычна здольны выконваць значную частку задач у праграмаванні, юрыспрудэнцыі, фінансах і бізнес-аналітыцы. А аналітыкі Cognizant прагназуюць, што колькасць звальненняў, звязаных з ШІ, можа ў гэтым годзе перавысіць 500 тысяч — гэта ў разы больш, чым годам раней.
Релоцировались? Теперь вы можете комментировать без верификации аккаунта.