ЗША больш не прыярытэт для IBM: кампанія загадала наймаць толькі ў Індыі і падладжвае мітынгі пад мясцовых супрацоўнікаў

Кампанія актыўна пераносіць вакансіі ў азіяцкую краіну. Так, 7 студзеня 2024 года на яе кар’ерным партале было ўсяго 173 пазіцыі ў Індыі. 23 лістапада іх стала ўжо 2946, а цяпер — 3866. Пры гэтым глабальны штат IBM за мінулы год скараціўся прыкладна на 12 тысяч чалавек. У ЗША колькасць вакансій на тры згаданыя даты складала 192, 376 і 333 адпаведна, але звольненыя супрацоўнікі сумняюцца, што іх заменяць амерыканскія суіскальнікі.

Аднаму супрацоўніку, з якім размаўляла выданне, было даручана навучыць індыйскіх навабранцаў «усяму, што ведае». А потым яму паведамілі аб звальненні. Звычайна пасля атрымання такога апавяшчэння супрацоўнікі IBM могуць падацца на іншыя вакансіі ў ЗША. Але, паводле крыніц The Register, кампанія не спяшаецца іх закрываць.

«Усе, каго я пытаўся пра „трансфер“, адказвалі адно і тое ж: „Мне можна наймаць толькі ў Індыі“», — распавёў суразмоўца выдання. Яшчэ ў 2017 годзе The Register жартам называў IBM «Indian Business Machines» — на той момант траціна яе штату знаходзілася ў Індыі і Бангладэшы.

Паводле аднаго з экс-супрацоўнікаў, кампанія скарачае людзей з вялікім — часам да дзясятка гадоў — досведам працы з воблачнымі тэхналогіямі і замяняе іх навічкамі, якія прайшлі ўсяго паўгадавую падрыхтоўку. Яшчэ больш трывожным ён лічыць тое, што QA цяпер цалкам вынесены на аўтсорс у Індыю. Усё гэта непазбежна прывядзе да рэзкага падзення якасці і эфектыўнасці паслуг IBM, дадае ён.

Больш за тое, кампанія ўключае ў праекты індыйскіх супрацоўнікаў, якія ў іх незацікаўленыя, і нават пачала падладжваць мітынгі амерыканскіх каманд пад часавыя паясы індусаў. Адзін суразмоўца паскардзіўся, што некалькі дзён не спаў начамі, працуючы над праектам з яшчэ адным калегам. Яны стварылі працоўны прадукт, але праект праваліўся з-за іншых людзей у камандзе, якія іх падвялі. Ён кажа, што IBM можа з такім жа поспехам цалкам пераехаць у Індыю, бо «ЗША для яе больш не прыярытэт»: «Кампанія выразна дала зразумець, на што робіць стаўку — коштам дасведчанных супрацоўнікаў, якасці працы і агульнай прадукцыйнасці».

У сярэдзіне сакавіка The Register пісаў пра звальненні ў падраздзяленні Cloud Classic. Крыніцы партала паведамлялі, што вызваленыя пазіцыі могуць быць перанесеныя ў Індыю — у студзені кампанія значна разбавіла многія каманды супрацоўнікамі адтуль. Таксама ёсць інфармацыя, што IBM скарачае у Канадзе.