ШІ ужо зараз можа замяніць 12% амерыканскіх работнікаў

Разам з даследчыкамі з Окрыджскай нацыянальнай лабараторыі (ORNL) яны стварылі маштабную сімуляцыю рынку працы, у якой 151+ млн занятых прадстаўлены як асобныя «агенты», кожны са сваімі навыкамі, задачамі, прафесіяй і геаграфіяй. У мадэлі ўлічваецца больш за 32 тысячы навыкаў, 923 прафесіі і 3 тысячы акруг. На аснове гэтага быў складзены Iceberg Index, які ацэньвае, якія тэхнічныя і кагнітыўныя задачы ўжо здольны выконваць ШІ.

Даследчыкі сцвярджаюць, што стандартныя метады ацэнкі патэнцыйнай аўтаматызацыі моцна заніжаюць рызыкі. Звычайна ўвага засяроджана на тэхналагічнай сферы, і тады «пад ударам» апынаецца толькі каля 2,2% работнікаў — гэта так званы Surface Index. Калі ўлічыць іншыя сферы кшталту адміністрацыйнай работы, фінансаў, прафесійных паслуг, то паказчык узрастае да 11,7%. У пераліку на заробкі гэта $1,2 трлн.

Прычым уразлівыя работнікі не толькі ў буйных гарадах на ўзбярэжжах, дзе звычайна канцэнтруюцца ІТ-кампаніі. Згодна з Iceberg Index, напрыклад, у штатах «іржавага пояса» кшталту Агаё і Мічыгана, а таксама Тэнэсі нізкія паказчыкі па бягучым укараненні ШІ хутка ўзлятаюць, калі ўлічыць пашыраны набор задач. Там пад пагрозай адміністрацыйныя, фінансавыя і прафесійныя ролі, якія падтрымліваюць вытворчыя ланцугі.

Аўтары праекта спадзяюцца, што індэкс дапаможа ўладам загадзя рыхтавацца да трансфармацыі, абараніць лакальную эканоміку і правы працоўных. Таксама інструмент дазваляе эксперыментаваць з рознымі рычагамі кшталту адукацыйных праграм або размеркавання бюджэту, каб спрагназаваць іх уздзеянне на рэгіянальную занятасць і ВУП.