Intel прыпыняе праекты ў Польшчы і Германіі на два гады

Кіраўнік Intel Пэт Гелсінгер адзначыў, што кампанія мае тэрмінова скарэктаваць свае выдаткі і выканаць план па эканоміі $10 млрд, анансаваны ў жніўні.

У красавіку Intel абвясціла, што яе вытворчае падраздзяленне ў 2023 годзе спрацавала са стратамі ў $7 млрд, а выручка ўпала на 31% год да года. Цяпер Intel хоча вылучыць вытворчасць чыпаў у незалежную кампанію.

У Нямеччыне Intel збіраецца ўзвесці два прадпрыемствы па кантрактнай вытворчасці чыпаў, а ў Польшчы — адное па тэсціраванні і ўпакоўцы чыпаў.

Усяго некалькі дзён таму польскія ўлады паведамілі, што атрымалі дабро ад Еўракамісіі на выдачу амерыканскай кампаніі амаль $2 млрд субсідый пад праект. Пасля свежага анонсу ад Гелсінгера было сказана, што ён размаўляў з міністрам лічбавізацыі Кшыштафам Гаўкоўскім і патлумачыў яму, што рашэнне звязанае з пагаршэннем глабальнага фінансавага становішча кампаніі. У міністэрстве дадалі, што гатовыя актыўна падтрымліваць іншыя інвестыцыі ў мясцовы паўправадніковы сектар у найбліжэйшыя месяцы.