Інвестыцыі Meta ў АІ «з'елі» прэміі і бонусы супрацоўнікаў

Паводле даных Financial Times, кампанія паменшыла памер штогадовых прэмій у выглядзе акцыянернага капіталу (equity refreshers) прыкладна на 10% для большасці супрацоўнікаў. Гэтыя прэміі з’яўляюцца значнай часткай узнагароджання работнікаў, нароўні з базавымі акладамі і грашовымі гадавымі прэміямі. Памер скарачэння прэмій можа вар'іравацца ў залежнасці ад аддзела і пасады супрацоўніка. Meta тлумачыць карэкціроўку памеру прэмій тэндэнцыямі ў галіне.

Скарачэнне прэмій адбываецца на фоне значных інвестыцый Meta ў вобласць штучнага інтэлекту. Генеральны дырэктар Meta Марк Цукерберг заявіў, што доўгатэрміновыя ўкладанні ў АІ пачнуць прыносіць вынікі ўжо сёлета. У 2025 годзе кампанія плануе інвеставаць ад $60 да $65 мільярдаў у гэтую сферу. Яе канкурэнты, такія як OpenAI і Amazon, таксама плануюць рэкордныя інвестыцыі ў АІ-інфраструктуру: агулам каля $320 мільярдаў.

Акрамя фінансавых мер, Meta таксама прымае кадравыя рашэнні для аптымізацыі выдаткаў. У 2022 і 2023 гадах кампанія звольніла некалькі тысяч супрацоўнікаў, а ў лютым гэтага года скараціла яшчэ 5% штату, патлумачыўшы звальненні нізкімі паказчыкамі работнікаў. Нягледзячы на скарачэнне прэмій і звальненні, акцыі Meta дэманструюць рост. Пасля дасягнення найніжэйшага пункта ў 2022 годзе, акцыі кампаніі выраслі на 13,39% за апошні месяц.