Айцішнік аформіў ІП у Грузіі і жыў у Беларусі. Грузінскі банк заблакаваў карту
Тэлеграм-канал «Ты таксама ў Грузіі?» расказвае дзве гісторыі, як грузінскі банк блакаваў ІП-рахункі айцішнікам. У адным выпадку рахунак заблакавалі беларусу, які карыстаўся замежнай картай у РБ, у іншым — расійцу пасля куплі крыптавалют. Дэдлайн блакаванняў у абодвух выпадках прыйшоўся на адну дату.
Жыў у Беларусі, карыстаўся грузінскай картай
Bank of Georgia паведаміў пра блакаванне майго ІП-рахунку пры канцы верасня. Ніякіх дакументаў не запытвалі, тлумачэнняў не давалі. Блакіроўка адбылася «паводле ўнутраных правіл банка».
Bank of Georgia — адзін з найбуйнейшых банкаў у Грузіі. У Беларусі працуе яго філіял — БНБ.
У той дзень была дзіўная хваля блакаванняў ад адной супрацоўніцы банка — чалавек сем закранула. Заблакавалі бізнэс-рахунак і сказалі, што аддадуць грошы толькі ў аддзяленні банка. Тыдзень правёў з імі на тэлефоне. У выніку яны далі магчымасць вывесці грошы з ІП-рахунку на фізасобу аддалена — разблакавалі ІП-рахунак на адну гадзіну, пасля заблакавалі зноў.
Мне дагэтуль ніхто не сказаў, што было б з грашыма, калі б я не забраў іх асабіста. Адказвалі толькі: «Рахунак будзе адключаны, зніміце грошы ў касе».
Калі спадзе ажыятаж ад мабілізацыі, палячу адкрываць рахункі ўжо ў некалькіх банках для падстрахоўкі.
Мы спрабавалі ў чатах знайсці заканамернасць блакавання — не знайшлі. У мяне грамадзянства РБ. Рахунак адкрываў аддалена, праз даверанасць на грузінскага «памагатара-рэгістратара». Усё адкрылі на пачатку жніўня — з першага разу, без праблем.
У мяне стабільныя добрыя даходы, кантракт, выпіскі з банкаў ЕС і РБ. Крыніца паступлення грошай — вядомы еўрапейскі распрацоўшчык софту. У некаторых маіх калегаў таксама ёсць ІП, але іх не закранула.
Я не здзяйсняў ніякіх пераказаў з бізнэс-рахунку, акрамя вываду на фізічны. З асабістага рахунку рабіў пераказы ў РБ і пакупкі ў крамах па карце, але яго не кранулі. Крыптавалютай не карыстаюся.
Фізічна знаходжуся цяпер у Беларусі, але ІП адкрыты ў Грузіі. Наўрад ці гэта можа быць прычынай, бо фізічны рахунак у мяне застаўся. Плюс шмат знаёмых дзейнічаюць дакладна гэтак жа, і па законе я нічога не парушаю. Бізнэс-рахунак ніяк не звязаны з РБ.
Пакуль што гэта горшы досвед узаемадзеяння з банкамі. Калі пачалі ўводзіць санкцыі, банкі ЕС «папрасілі на выхад». Але не блакавалі рахункаў і не абмяжоўвалі плацяжоў. Далі, здаецца, 2 месяцы на завяршэнне кантрактаў і вывад сродкаў.
Натуральна, дзіўны гэты банк — BoG. Грошы з ІП на фізасобу пераказваюцца толькі з прызначэннем «money transfer». На фізасобе звычайныя swift-пераказы праз раз адхіляюцца, але пры паўторы ўжо прапускаюцца. Быццам на кожнае рашэнне кубікі кідаюць. Заяўкі на адкрыццё рахунку перыядычна губляюць (у чатах пра гэта часта пішуць), людзям адкрывалі рахункі пасля дзвюх-трох адмоў KYC («Know Your Customer» — анкета для адкрыцця банкаўскага рахунку. — Заўв. рэд.).
Блакаванне пасля куплі крыптавалюты
Я грамадзянін РФ. Чатыры месяцы таму адкрыў ІП-рахунак у Bank of Georgia. Тады праблем не было, я падаў інвойсы (міжнароднае пазначэнне рахунку) і кантракт на англійскай.
Гэтыя чатыры месяцы атрымліваў заробак у еўра, там назапасілася нармальная сума. Усе грошы перавёў з ІП-рахунку на фізічны, еўра прадаў, купіў лары. Потым з гэтых лары купіў USDT (крыптавалюту) на біржы Binance — у фармаце p2p.
Праз два месяцы пасля куплі, а дакладней на мінулым тыдні, я атрымаў ліст, што мае рахункі заблакуюць у аднабаковым парадку. Што, маўляў, я парушыў банкаўская пагадненне. Без спасылак і тлумачэнняў.
Цяпер чакаю 28 кастрычніка, калі наступіць блок (пакуль нічога з акаўнтам не зрабілі).
Читать на dev.by