Кітайскія кампаніі спецыяльна праектуюць менш магутныя працэсары, каб пазбегнуць санкцый ЗША

Гэта звязана з амерыканскімі санкцыямі, якія былі закліканыя перашкодзіць прарыву кітайскага боку ў распрацоўцы АІ і суперкамп’ютараў. ЗША пастрожылі экспарт прасунутых працэсараў ад кампаній накшталт Nvidia, а таксама абсталявання для іх вырабу. TSMC і іншым замежным чыпмэйкерам, якія выкарыстоўваюць амерыканскае абсталяванне, забаронена прымаць заказы на іх выпуск.

Паводле слоў крыніц выдання, санкцыі прадэманстравалі, наколькі абмежаваныя магчымасці вытворчасці перадавых чыпаў у Кітая і як моцна мясцовыя распрацоўшчыкі залежаць ад кантрактных вытворцаў.

Шанхайскія MetaX (заснаваная выхадцамі з AMD) і Enflame — дзве лідзіруючыя кітайскія кампаніі-распрацоўшчыцы АІ-чыпаў — пры канцы 2023 года перадалі на вытворчасць TSMC чыпы з наўмысна заніжанай магутнасцю, каб не патрапіць пад санкцыі ЗША. Раней яны ставілі свае працэсары ў адзін шэраг з GPU Nvidia. У снежні Джэнсен Хуанг казаў, што ў Кітаі з ёй супернічаюць Huawei і яшчэ каля 50 стартапаў, якія займаюцца АІ-чыпамі.

У TSMC адмовіліся каментаваць канкрэтных кліентаў, але сказалі, што заўсёды выконваюць правілы працы, якія дзейнічаюць у дачыненні да іх юрысдыкцый.