Кітайскія навукоўцы заявілі, што ядро Зямлі стала круціцца ў іншы бок — і даўжыня дня змянілася

У даследаванні, якое правялі І Ян і Сяадун Сун з Пекінскага ўніверсітэта, сказана, што ўнутранае ядро Зямлі запаволіла і, верагодна, змяніла кірунак кручэння. Гэта прывяло да змены працягласці дня на долі мілісекунды на працягу года. Навукоўцы прааналізавалі сейсмічныя хвалі, выкліканыя землятрусамі, пачынаючы ад 1960-х гадоў.

Высветлілася, што ў перыяд ад 2009 да 2020 года кручэнне ўнутранага ядра спынілася і, магчыма, змяніла кірунак. Вынікі назіранняў супадаюць са зменамі ў магнітным полі Зямлі і ў працягласці дня. «Гэта сведчыць пра дынамічнае ўзаемадзеянне паміж пластамі Зямлі ад самых глыбокіх нетраў да паверхні», — гаворыцца ў навуковай працы.

Унутранае ядро Зямлі цвёрдае і складаецца пераважна з жалеза і нікелю. Ад астатняй паверхні планеты яно аддзеленае вадкім вонкавым ядром, што дазваляе яму круціцца не так, як уся планета. Вонкавае ядро аддзеленае ад зямной кары мантыяй. Навукоўцы аналізуюць будову і склад геасферы, вывучаючы, як пераламляюцца сейсмічныя хвалі пры пераходзе праз цэнтр Зямлі.