За два гады штат кампаніі вырас больш чым у пяць разоў. Пры гэтым дзякуючы Claude супрацоўнікі выконваюць задачы, для якіх раней спатрэбіліся б значна большыя каманды.
За два гады штат кампаніі вырас больш чым у пяць разоў. Пры гэтым дзякуючы Claude супрацоўнікі выконваюць задачы, для якіх раней спатрэбіліся б значна большыя каманды.
Раней кампанія падала ў Камісію па каштоўных паперах і біржах ЗША заяўку для выхаду на біржу, у якой у тым ліку падрабязна апісала сваю кадравую палітыку і выкарыстанне Claude. У канцы 2024 года ў Anthropic працавала каля 940 чалавек, а да канца верасня 2026-га — ужо 5300. Большасць супрацоўнікаў занятыя даследаваннямі, інжынерыяй і распрацоўкай прадуктаў.
Нягледзячы на хуткі рост штату, кампанія імкнецца павялічваць бізнес без прапарцыянальнага пашырэння каманды. У верасні больш за 90% змяненняў у яе кодавай базе былі напісаны Claude. Распрацоўшчыкі ўсё часцей ставяць агентам задачы і правяраюць вынікі, а не пішуць код радок за радком.
Паводле дадзеных Anthropic, у трэцім квартале 2026 года сярэдні штодзённы аб’ём кода, які дадаваўся ў праекты ў разліку на аднаго інжынера, быў больш чым у 45 разоў вышэйшы за сярэднядзённы паказчык за 2024 год.
У дакументах кампанія раскрыла іншыя паказчыкі ўнутранага выкарыстання ШІ. Cf студзеня па верасень 2026 года разліковы кошт работы Claude ўнутры Anthropic вырас больш чым у 250 разоў. Ужо ў красавіку ён упершыню перавысіў месячныя расходы на персанал без уліку выплат акцыямі. Гаворка ідзе не пра фактычныя выдаткі на ўласны ШІ, а пра кошт яго выкарыстання па публічных тарыфах.
Расце і выручка ў разліку на супрацоўніка. За 12 месяцаў да канца верасня 2026 года яна перавысіла $6,6 мільёна супраць $1,4 мільёна годам раней. У Anthropic звязваюць гэта ў тым ліку з актыўным прымяненнем Claude ва ўсіх падраздзяленнях.
Пры гэтым ШІ мяняе патрабаванні да персаналу. У асобным даследаванні, апублікаваным 16 кастрычніка, кампанія прызнала, што стала наймаць параўнальна менш пачаткоўцаў-тэхнічных спецыялістаў. З пачатку 2025 года іх доля сярод новых супрацоўнікаў тэхнічных падраздзяленняў скарацілася з 27% да 9%.
Адначасова расце аб’ём працы, які выконвае ШІ. Да жніўня 2026 года сумарны час працы інтэрактыўных ШІ-агентаў, запушчаных супрацоўнікамі, у шэсць разоў перавысіў разліковы працоўны час саміх супрацоўнікаў.
Мяняюцца і крытэрыі найму. Кіраўнікі ўсё больш цэняць самастойнасць і здольнасць прымаць рашэнні, а не толькі вузкія тэхнічныя навыкі. Пры гэтым Anthropic падкрэслівае, што мэтанакіравана шукае спецыялістаў з нетрадыцыйнай для ШІ-кампаній адукацыяй, у прыватнасці ў галіне філасофіі, журналістыкі і педагогікі.
Яшчэ адзін прынцып Anthropic — карпаратыўная культура «без вялікага эга» (low-ego). Кампанія чакае, што супрацоўнікі будуць ставіць агульныя мэты вышэй за асабісты статус і пасаду. У дакуменце гаворыцца, што пры абмеркаванні рашэнняў павінен перамагаць самы пераканальны аргумент, а не меркаванне самага старэйшага кіраўніка.
Асаблівую ўвагу Anthropic надае ўтрыманню спецыялістаў. За 12 месяцаў да 30 верасня кампанія страціла толькі каля 1% супрацоўнікаў, сыход якіх лічыла нежаданым. Гэта не агульны паказчык цякучасці, а доля страт каштоўных для кампаніі супрацоўнікаў.
Аднак IPO стварае новыя рызыкі. У рэгістрацыйных дакументах Anthropic папярэджвае, што некаторыя ранні супрацоўнікі ды кіраўнікі валодаюць буйнымі пакетамі акцый, якія ўжо перайшлі або пяройдуць у іх поўнае распараджэнне пасля выхаду на біржу. Гэта можа паўплываць на іхнае рашэнне працягваць працу ў кампаніі.
Яшчэ адна рызыка звязана з місіяй Anthropic. Кампанія прызнае, што многія ключавыя спецыялісты прыйшлі працаваць над бяспечным развіццём ШІ. Калі яны перастануць падзяляць каштоўнасці працадаўцы або знойдуць арганізацыю, якая лепш адпавядае іхным перакананням, утрымаць іх будзе складаней.
Релоцировались? Теперь вы можете комментировать без верификации аккаунта.