Кофаўндар Google растлумачыў, чаму вярнуўся ў кампанію і працуе амаль кожны дзень. І чаму праваліліся разумныя акуляры Google Glass
Сузаснавальнік Google Сяргей Брын выступіў на ўчорашняй фірменнай канферэнцыі I/O для распрацоўшчыкаў разам з Дэмісам Хасабісам — кіраўніком DeepMind, ШІ-падраздзялення кампаніі. Брын распавёў, чаму вярнуўся пасля адстаўкі і што ён вынес з правалу акуляраў Google Glass больш за дзесяць гадоў таму.
Увогуле Брын вярнуўся ў кампанію яшчэ ў 2023 годзе пасля рэлізу ChatGPT. Ён сказаў, што цяпер прыходзіць на працу «амаль кожны дзень», каб удзельнічаць у навучанні найноўшых мадэляў сямейства Gemini. Ён дадаў, што яму вельмі цікава паглыбляцца ў тэхнічныя дэталі гэтай тэмы.
На гэтай жа канферэнцыі ў 2012 годзе Брэн прэзентаваў відэа, на якім ён скача з парашутам у акулярах Google Glass — тады кампанія рабіла першыя крокі ў сферы wearable прылад. Кампанія спыніла продаж акуляраў прыкладна дзесяць гадоў таму.
На ўчорашняй канферэнцыі Брэн растлумачыў няўдачу тым, што тады ён не меў патрэбных ведаў пра вытворчыя і лагістычныя ланцужкі.
«Я сапраўды нічога не ведаў пра ланцужкі паставак бытавой электронікі. І пра тое, наколькі складана будзе стварыць [разумныя акуляры] па прымальным кошце», — прызнаўся ён. Версія Google Glass для распрацоўшчыкаў была вельмі дарагой і каштавала $1500.
Што да новых акуляраў змяшанай рэальнасці ад Google, Брын настроены значна больш аптымістычна. Ён адзначыў, што цяпер ШІ значна магутнейшы і адкрывае новыя магчымасці для такіх гаджэтаў.
Читать на dev.by