Кампаніі засумняваліся ў карысці ад пераходу ў воблака: гэта больш не эканоміць грошай

Больш за траціну апытаных арганізацый прызналася, што рашэнне перайсці ў воблака не апраўдала іх чаканняў па аптымізацыі выдаткаў. Больш чым у паловы такі выбар прывёў да росту выдаткаў на ІТ-інфраструктуру.

Трыма найбуйнейшымі пастаўшчыкамі на сусветным воблачным рынку з’яўляюцца Amazon, Microsoft і Google. У Civo адзначаюць, што ўсе тры за апошні час моцна паднялі цэны на свае паслугі. Так, базавы кластар з трох вузлоў з 200 Гб сховішча і 5 Тб трафіку ў Microsoft Azure падаражэў з $1278,58 у 2022 годзе да $1458,68 у 2024-м, у Google — з $1107,61 да $1250,35, а ў Amazon — з $1142,46 да $1234,59.

Кампаніі, якія аддалі перавагу воблаку перад уласнай інфраструктурай, разлічвалі, што аддача ад такога выбару з часам будзе толькі расці і карыстацца воблакам будзе выгадней з фінансавага пункта гледжання. На справе ж цэны растуць хутчэй за інфляцыю, а набор паслуг, якія атрымліваюць кліенты, застаецца ранейшым.

У Gartner кажуць, што кантроль выдаткаў, заснаваны на эксплуатацыі дата-цэнтраў у вялікіх маштабах, быў часткай першапачатковай прапановы вендараў і ў наступныя 15 гадоў сябе апраўдваў, паколькі кошт заставаўся на ўзроўні ці зніжаўся, альбо дадаваліся новыя функцыі за тую ж цану. Аднак рэзкае падаражанне электраэнергіі і кошту кваліфікаваных ІТ-спецыялістаў у пандэмію прывяло да ціску на правайдараў, у выніку чаго яны перакладаюць выдаткі на кліентаў.

У Microsoft і Google адмовіліся каментаваць даклад.