Кампаніі ў ЗША наймаюць усё менш распрацоўшчыкаў — трэнд на зніжэнне ад канца 2019

Попыт кампаній на распрацоўшчыкаў рос да лістапада 2019 года, пасля чаго — нягледзячы на «рэмісію» ў жніўні 2021-га і кастрычніку 2022-га — няўхільна зніжаўся. Найбольш рэзкія падзенні адбыліся ў студзені і маі 2022-га, а таксама ў студзені 2023-га.

Акрамя таго, рост заробкаў такіх спецыялістаў адставаў ад сярэдняга па краіне. За разгледжаны перыяд медыянны заробак распрацоўшчыкаў павялічыўся на 24%, а ў цэлым па ЗША — на 30%. Важна адзначыць, што распрацоўшчыкі атрымліваюць больш чым удвая за медыяну па ЗША. Паводле даных Мінпрацы ЗША, медыянны заробак распрацоўшчыкаў софту складае $132 270 на год.

Эканамісты Glassdoor прызнаюць, што рынак ІТ-вакансій запаволіўся ад канца 2022 пасля пары гадоў актыўнага наймання ў пандэмію. Падзенне попыту на айцішнікаў тут тлумачаць ростам працэнтных ставак, завяршэннем характэрных для пандэміі тэндэнцый і агульным запаволеннем эканомікі. «Тым не менш занятасць у тэхналагічным сектары ўпала менш чым на 2% у параўнанні з пікавымі значэннямі снежня 2022 года і ўсё яшчэ на 21% вышэй, чым у сакавіку 2020 года», — падзяліліся ў Glassdoor з Business Insider.

У ADP кажуць, што софтверная распрацоўка ні ў якім разе не «састарэлая прафесія». Але адзначаюць, што пошук працы ў такіх спецыялістаў можа займаць даўжэй, паколькі прафесія гэтая стала «вельмі эфектыўнай», што зніжае патрэба ў людзях.

На платформе Indeed сумняваюцца, што ў найбліжэйшы час запатрабаванасць кадраў у софтвернай распрацоўцы вернецца на ўзровень 2021–2022 гадоў. Тут дапускаюць, што падзенне колькасці вакансій можа быць цыклічнай або кароткатэрміновай з’явай — магчыма, працадаўцы сталі асцярожнейшымі праз высокія стаўкі і негатыўны досвед празмернага наймання ў 2021 годзе.