Пасля інтэграцыі АІ-функцый у пашукавік Google карыстальнікі пачалі заўважаць дзіўныя адказы ў пошукавай выдачы. Кампанія ў спешцы выдаляе АІ-агляды на канкрэтныя пошукавыя запыты.
Пасля інтэграцыі АІ-функцый у пашукавік Google карыстальнікі пачалі заўважаць дзіўныя адказы ў пошукавай выдачы. Кампанія ў спешцы выдаляе АІ-агляды на канкрэтныя пошукавыя запыты.
Google ужо некалькі месяцаў тэсціруе АІ-функцыю Search Generative Experience. Паводле слоў гендырэктара Google Сундара Пічаі, ад мая мінулага года сэрвіс апрацаваў больш як мільярд запытаў. За перыяд тэсціравання атрымалася на 80% знізіць кошт функцыі дзякуючы «апаратным, інжынерным і тэхнічным прарывам».
Пасля таго як новы пошукавы інструмент AI Overview стаў даступны карыстальнікам ЗША, у сацсетках сталі з’яўляцца агляды на адказы АІ. Напрыклад, пашукавік прапанаваў выкарыстоўваць клей для замацавання начыння на піцы або з’ядаць па камені на дзень для задавальнення патрэб арганізма ў мінералах.
Журналіст Associated Press спытаў Google, ці былі калі-небудзь каты на Месяцы, і сістэма адказала сцвярджальна: «Так, астранаўты сустракалі катоў на Месяцы, гулялі з імі і клапаціліся пра іх». АІ дадаў: «Напрыклад, Ніл Армстранг сказаў: «Адзін маленькі крок для чалавека», маючы на ўвазе каціны крок. А яшчэ Баз Олдрын трымаў катоў на караблі «Апалон-11».
Гэтыя прыклады — ілюстрацыя распаўсюджанай праблемы «галюцынацый». Моўныя мадэлі, якія выкарыстоўваюцца ў сістэмах АІ, могуць прыдумляць інфармацыю, грунтуючыся на даных, на якіх яны навучаліся. Гэтыя даныя могуць утрымліваць перадузятасці і памылкі, сістэма будзе паўтараць іх і вынаходзіць новыя.
Нягледзячы на крытыку, кампанія працягвае настойваць, што пашукавік у большасці выпадкаў дае карыстальнікам «высакаякасную інфармацыю». Прадстаўнік кампаніі патлумачыў памылкі «нестандартнымі запытамі», а таксама абвінаваціў карыстальнікаў у публікацыі фэйкавых скрыноў, паколькі супрацоўнікі не змаглі паўтарыць гэтыя адказы.
Google прызнала, што выдаляе згенераваныя агляды па пэўных запытах, «дзе гэта неабходна ў адпаведнасці з нашай палітыкай у дачыненні да кантэнту». Няўдалыя адказы АІ выкарыстоўваюць пры распрацоўцы паляпшэнняў для пашукавіка, некаторыя з іх «ужо пачалі ўкараняцца».
Эксперты па штучным інтэлекце сумняваюцца, што магчыма стварыць АІ-сэрвіс з дакладнасцю 100%. На думку прафесара Гэры Маркуса, дасягнуць дакладнасці ў 80% дастаткова проста, аднак пераадолець апошнія 20% — надзвычай складаная задача. Для гэтага алгарытмы маюць навучыцца «разважаць», наколькі праўдападобная тая ці іншая інфармацыя.
Прафесарка лінгвістыкі Вашынгтонскага ўніверсітэта Эмілі Бэндэр раней папярэджвала Google аб патэнцыйных праблемах пры выкарыстанні моўных мадэляў. Вучоная казала, што сістэмы АІ могуць пагаршаць існы ў грамадстве расізм, сэксізм ды іншыя забабоны і стэрэатыпы.
Іншая праблема, звязаная з АІ-пошукам, менш прыкметная. Выдача гатовых адказаў пазбаўляе людзей магчымасці самастойнага пошуку інфармацыі. У карыстальніка няма неабходнасці наведваць мноства рэсурсаў і супастаўляць крыніцы, калі яму прапануецца гатовы адказ. Гэта прыводзіць да зніжэння карыстальніцкай актыўнасці і страты трафіку для ўладальнікаў многіх сайтаў.
Рэлацыраваліся? Цяпер вы можаце каментаваць без верыфікацыі акаўнта.