«Усё захоўваю ў далярах, і мне ок». Сакральны бакс ужо не той — як зберагаюць айцішнікі. 5 кейсаў

Даляр другі год стабільна расчароўвае тых, хто да яго прывязаны — ці жыве ён у Беларусі, ці ў Еўропе. Толькі за апошні год мінус 13% да беларускага рубля, мінус 7,5% да еўра і мінус 4,5% да злотага. Тым не менш амаль у 60% беларускіх айцішнікаў зарплата застаецца прывязанай да амерыканскай валюты і скардзіцца на гэта яны не спяшаюцца.

А што ж тыя звычайныя беларусы, якія гадамі (і дзесяцігоддзямі) зберагалі выключна ў далярах і назапасілі-такі важкую «катлету»? Спыталі, што яны цяпер з ёй робяць — «ядуць», канвертуюць ці захоўваюць у нязменным выглядзе, назіраючы, як «катлетка» сохне? (Добра, апошні тыдзень ужо не сохне, але гэта не вельмі змяняе справу).

Так атрымалася, што ўсе, хто адгукнуўся, жывуць цяпер у Польшчы, так што па іх гаманцах прайшлося перш за ўсё ўмацаванне злотага. Зрэшты, не ўсе, хто прыйшоў на кліч, валодаюць менавіта «катлетамі» — у кагосьці гэта «бліны», а камусьці не атрымліваецца адкласці і іх — усё сыходзіць на бягучыя выдаткі. Выслухалі і іх таксама.

«Мне прасцей зарабляць, чым турбавацца з-за курсу»

Даход у далярах, выдаткі ў злотых і інш., «катлета» — крыпта+акцыі+грошы.

«Маю некалькі кантрактаў з амерыканскімі кампаніямі і атрымліваю аплату ў далярах. Працую з Польшчы.

Што раблю з грашыма: частку пераводжу ў крыпту або ў акцыі праз пакупку USDT/USDC, частку мяняю на злотыя для пакрыцця бягучых выдаткаў, частку пераводжу на Revolut і канвертую ў розныя валюты — мы з сям’ёй шмат падарожнічаем.

Крыпта — у мяне 20 розных пазіцый, ад BTC да топ-100 альткоінаў — проста ляжыць. Я ўсталяваў лімітныя ордэры на пакупку/продаж у залежнасці ад фазы рынку, гэта значыць актыўна не гандлюю, але і без нагляду крыпту стараюся не пакідаць. За зіму мой крыптапакет даў прасадку працэнтаў на 30 (мы шмат падарожнічалі, і я прамаргаў фазу падзення), але я магу з гэтым жыць і чакаць наступнага разу.

На біржы купляю ў асноўным індэкс S&P 500, перыядычна раблю кропкавую пакупку-продаж акцый. Але ўсё гэта ў такенізаваным выглядзе — мне лянота працаваць з паўнавартаснымі брокерамі.

«Калі ўжо нешта здарыцца з далярам, то астатнія валюты на кавалачкі разарве»

Даход пераважна ў далярах, неабходныя выдаткі ў злотых, «катлета» — аблігацыі+акцыі+грошы.

«Я ўсё захоўваю ў далярах, і маральных праблем наконт прасадкі амерыканскай валюты не адчуваю. Нягледзячы на тое, што частка даляраў была куплена ў 2022 годзе па 5 злотых (да 2021 года і цяпер зарабляю напрамую ў USD).

Назапасіў «катлету» на 4-6 гадоў жыцця ў Польшчы — пакуль яе не трачу, не канвертую і нават не планую. Прыкладна траціну захоўваю ў аблігацыях ЗША, яшчэ траціна — у акцыях, яшчэ траціна — проста грашыма ў двух польскіх банках + Revolut.

Інвестую з 2018 года, бягучыя карэкцыі і прасадкі на мае паводзіны амаль не ўплываюць: рынак павінен ад’ехаць ад 25%, каб я пачаў задумвацца.

Гэта я яшчэ пра палітыку не кажу. Згадваючы стары жарт «кропля нікаціну забівае каня, а хамячка разрывае на кускі»: калі ўжо нешта здарыцца з далярам, то астатнія валюты і эканомікі наогул на кавалачкі разарве. Сусветная фінансавая сістэма шмат у чым завязана на дзярждоўг ЗША, гэта забяспечвае стабільны даляр. Іншых такіх валют пакуль няма.

Так, я прымаю аргумент тых, хто кажа, што даляры ім не патрэбныя, бо яны не жывуць у ЗША і траціць грошы там не збіраюцца. Довад абсалютна слушны, але ўсё залежыць ад мэтаў і гарызонту планавання.

Калі мэта — купіць машыну ці кватэру, то збіраць лепш у валюце тавару. Калі гаворка пра інвестыцыі, тут дзейнічаюць іншыя правілы. Калі вы вымушаны траціць інвестыцыйны капітал на бягучыя пакупкі, то гэта затыканне дзір, і ў гэтым выпадку ставіць пытанне пра выгаду, на мой погляд, некарэктна: затыканне дзір — заўсёды страта.

У мяне гарызонт інвеставання — 10+, а то і 20+ гадоў. Як буду траціць, пакуль не ведаю, усё будзе залежаць ад абставін, свет хутка змяняецца».

«Зарабіў +50%, нягледзячы на курс даляра»

Даходы ў далярах, выдаткі — у злотых, інвестыцыі — у акцыі амерыканскіх кампаній.

«Пераехаў з Беларусі ў Польшчу. Мая зарплата заўсёды была прывязана да даляра і ўсё яшчэ да яго прывязана. У апошнія гады гэта сумна, але не смяротна.

У папярэдняй кантораы я атрымліваў наўпрост ў далярах (цяпер па курсе ў злотых), і калі злоты пачаў расці, было вельмі непрыемна. Але тады я стараўся даляры з рахунку па магчымасці не выводзіць. І так супала, што якраз у гэты час я пачаў інвеставаць у акцыі амерыканскіх кампаній.

Амаль палову ўклаў у Nvidia, астатняе — у Google, медыцынскую кампанію TransMedics Group, Microsoft і іншыя па дробязях. Спачатку купляў акцыі праз Revolut, потым перайшоў на XTB, бо там зручней з польскімі падаткамі.

Гледзячы на цану акцый цяпер, разумею, што зарабіў за год +50%, нягледзячы на больш танны даляр.

Частку грошай я проста зберагаю ў далярах і еўра. У цэлым я не столькі інвестую, колькі спрабую захаваць заробленае. Так-та з-за ўмацавання злотага для мяне ўсё ў Польшчы падаражэла на 10%».

«Ляжалі $10K. З прыходам Трампа — мінус $500»

Даход у далярах, выдаткі — у злотых, назапашванні — у злотых.

«У мяне зарплата ў далярах, а жывём мы ў Польшчы сям’ёй з чатырох чалавек.

Пасля продажу маёмасці ў Беларусі заставалася $10К. Але з прыходам Трампа курс папоўз, і за пару месяцаў гэта стопка палягчэла на 500$.

Кожныя два тыдні, атрымліваючы даляры па інвойсу праз інкубатар, я звычайна адразу мяняю іх і вывожу на рахунак у злотых. Па-першае, у Польшчы за даляры нічога не купіш. Так, курс даляра мяняўся ад 3,2 да 4,5 злотага, але ўсім абыякава — гэта не ў разы, як у РБ, таму запасаць інвалюту сэнсу няма. Па-другое, мы задумваемся пра іпатэку, а я чуў, што пры разліку крэдытаздольнасці ўлічваецца толькі даход у злотых. Значыць, калі я буду праводзіць рэшту у далярах, то паменшу свае патэнцыйныя шансы на гэты самы крэдыт.

«Горш катлеты ў далярах толькі зарплата ў далярах»

Даходы ў далярах, выдаткі — у злотых, назапашванні ў абедзвюх валютах.

«Я працую з Польшчы на амерыканскі і канадскі бізнес і атрымліваю даход у далярах. Адкладваць атрымліваецца 3000-4000 злотых у месяц. Частку сродкаў трымаю ў далярах, бо не заўсёды атрымліваецца іх адразу абмяняць па добрым курсе, частку — у злотых.

Звычайна гэта сума на 2-3 месяцы жыцця + аплату падаткаў за такі ж перыяд. Мегазберажэнняў у мяне няма, таму што амаль усё цяпер сыходзіць у іпатэку. Гэта прыярытэт».

«Так і захоўваю — у расійскіх рублях. Можа, вайна скончыцца, RUB яшчэ вырасце». Да чаго прывязваюць зп у Беларусі ў 2025? Даляр усё? (Дзіўна, але не)

Па тэме

«Так і захоўваю — у расійскіх рублях. Можа, вайна скончыцца, RUB яшчэ вырасце». Да чаго прывязваюць зп у Беларусі ў 2025? Даляр усё? (Дзіўна, але не)