Юрый Назарэнка стварыў сервіс OnlyFake, які прадаваў падробленыя дакументы па $15. Пасля года ў амерыканскай турме ён упершыню расказаў, як ягоны праект ператварыўся ў інструмент міжнароднага махлярства.
Юрый Назарэнка стварыў сервіс OnlyFake, які прадаваў падробленыя дакументы па $15. Пасля года ў амерыканскай турме ён упершыню расказаў, як ягоны праект ператварыўся ў інструмент міжнароднага махлярства.
У інтэрв’ю 404 Media 28-гадовы Назарэнка расказаў гісторыю OnlyFake — сервісу, які дазваляў генераваць рэалістычныя выявы пашпартоў, пасведчанняў кіроўцы ды іншых дакументаў з дапамогай ШІ.
Пачыналася ўсё з ручной працы ў Photoshop. Назарэнка сядзеў у кватэры свайго дзеда ва Украіне і гадзінамі рэдагаваў сканы пашпартоў, мяняючы фатаграфіі, асабістыя дадзеныя і машынначытаныя радкі. На выраб аднаго якаснага дакумента мог сыходзіць цэлы тыдзень.
Паступова ён стварыў шаблоны, аўтаматызаваў запаўненне дакументаў, а затым падключыў генератыўны ШІ. Так з’явіўся OnlyFake, дзе карыстальнікам больш не патрабаваліся навыкі працы з графічнымі рэдактарамі.
Сервіс ствараў не толькі сканы дакументаў, але і фатаграфіі, на якіх падроблены пашпарт або пасведчанне кіроўцы выглядалі нібыта ляжалі на стале, канапе або дыванку. Такія выявы маглі падманваць сістэмы онлайн-верыфікацыі асобы.
У 2024 годзе журналіст 404 Media праверыў сервіс на практыцы. Ён сгенераваў падроблены дакумент і паспяхова прайшоў з ім праверку асобы на крыптабіржы OKX.
Паводле дадзеных Міністэрства юстыцыі ЗША, праз OnlyFake было створана не менш за 10 тысяч падробленых дакументаў. Сервіс прапаноўваў пасведчанні кіроўцы ўсіх 50 штатаў ЗША, амерыканскія пашпарты і дакументы прыкладна 56 іншых краін.
Аплата прымалася ў крыптавалюце, а для буйных замоўнікаў дзейнічалі скідкі. Можна было набыць адразу да тысячы дакументаў. Назарэнка пагадзіўся перадаць дзяржаве $1,2 мільёна, якія пракуратура звязала з дзейнасцю сервісу.
Асабліва нечаканым аказалася выкарыстанне OnlyFake паўночнакарэйскімі ІТ-спецыялістамі, якія ўладкоўваліся на дыстанцыйную працу пад чужымі асобамі.
Як высвятліла выданне, яшчэ ў лютым 2024 года Назарэнка атрымаў ліст ад экспертаў ААН. Яны паведамілі, што паўночнакарэйскія ІТ-работнікі выкарыстоўвалі OnlyFake для выраблення дакументаў, неабходных пры стварэнні акаўнтаў і пошуку дыстанцыйна працы.
Падобныя схемы даўно расследуюць амерыканскія ўлады. Паўночнакарэйскія спецыялісты выдаюць сябе за замежных распрацоўшчыкаў, уладкоўваюцца ў заходнія кампаніі і пералічваюць частку заробку ўладам КНДР. Часам яны таксама атрымліваюць доступ да канфідэнцыяльных карпаратыўных дадзеных.
Пасля першага расследавання 404 Media Назарэнка пачаў баяцца арышту. Паводле яго, ён знішчыў ноўтбук, выдаліў электронную перапіску і змяніў тэлефон. У чэрвені 2025 года яго затрымалі ў Румыніі, а ў верасні экстрадавалі ў ЗША. У лютым 2026-га ён прызнаў віну ў змове з мэтай махлярства з пасведчаннямі асобы.
Яму пагражала да 15 гадоў зняволення. Аднак суд прызначыў пакаранне ў выглядзе 12 месяцаў пазбаўлення волі, якія Назарэнка на той момант ужо правёў пад вартай. Пасля вызвалення ён яшчэ некаторы час знаходзіўся ў імміграцыйным цэнтры ICE, а затым быў дэпартаваны. Цяпер Назарэнка жыве ў Азіі.
У інтэрв’ю ён прызнаў, што недаацэньваў наступствы свайго праекта. «На практыцы мы працавалі амаль як звычайны тэхналагічны стартап — толькі на нелегальным рынку», — лічыць Назарэнка.
Релоцировались? Теперь вы можете комментировать без верификации аккаунта.