Айцішнікам падрыхтавацца: «хросны бацька» ШІ назваў прафесіі, дзе заменяць усіх. І дзе не заменяць

«Штучнаму інтэлекту яшчэ доўга не будуць так добра ўдавацца фізічныя маніпуляцыі. Так што добрым рашэннем было б пайсці ў сантэхнікі», — адзначыў ён.

«У рутыннай разумовай працы ШІ заменіць усіх», — вынес свой прысуд навуковец. У зоне рызыкі, напрыклад, юрысты, і ён нікому не пажадаў бы працаваць у кол-цэнтры. Каб не страціць працу з-за ШІ, паводле словаў Хінтана, трэба быць вельмі класным прафесіяналам.

Таксама ён лічыць рызыку масавага скарачэння працоўных месцаў галоўнай і самай блізкай пагрозай з боку ШІ, якая зробіць людзей няшчаснымі. Нягледзячы на ідэю безумоўнага базавага даходу, Хінтан мяркуе, што без працы людзі страцяць пачуццё сэнсу ў жыцці.

На яго думку, масавае скарачэнне хутчэй адбудзецца, чым не адбудзецца, і нават у нейкім плане ўжо адбываецца. ШІ ўжо выкарыстоўваецца ў прафесіях, якія раней былі папулярныя ў выпускнікоў, кажа Хінтан.

Некаторыя прадстаўнікі тэхнасферы сцвярджаюць, што страхі, што ШІ возьме на сябе ўсю працу, якую раней рабілі джуны, перабольшаныя. Хінтан згодны з імі і лічыць, што некаторых людзей заменяць іншыя людзі, якія ўмеюць абыходзіцца з ШІ, а не ўласна ШІ — той выпадак, калі адзін чалавек з ШІ здольны рабіць працу, якую раней рабілі дзесяць чалавек. У многіх сферах гэта выкліча масавыя звальненні. Толькі ў нямногіх сферах накшталт аховы здароўя людзі будуць заставацца надзвычай запатрабаваныя, падсумаваў Хінтан.