Куды ўжо болей: YouTube дадасць рэкламу ў самыя цікавыя часткі відэа

Peak Points выкарыстоўвае штучны інтэлект ШІ-мадэляў сямейства Gemini для аналізу элементаў відэа, такіх як кадры і транскрыпты. Алгарытм вызначае моманты з найвышэйшай уцягнутасцю гледачоў або найбольшай эмацыйнай значнасцю і прапануе размяшчаць рэкламу адразу пасля іх.

Мяркуецца, што новы фармат павялічыць колькасць праглядаў і клікаў, што, у сваю чаргу, падвысіць даходы стваральнікаў кантэнту. Супрацоўнікі платформы лічаць, што ў моманты павышанага эмацыйнага стану гледачы лепш запамінаюць рэкламу, адзначае TechCrunch. Цяпер фармат знаходзіцца на стадыі пілотнага тэставання і будзе цалкам уведзены цягам 2025 года.

Аднак такія перапынкі могуць раздражняць гледачоў, асабліва калі яны глыбока пагружаныя ў эмацыйную кульмінацыю відэа і хочуць хутчэй працягнуць прагляд. Карыстальнікі могуць успрымаць рэкламу як перашкоду, што разрывае сувязь з кантэнтам.

Таксама платформа прэзентавала інтэрактыўную прадуктовую стужку для тэлевізійнай рэкламы, якая дазваляе гледачам праглядаць і набываць тавары проста падчас рэкламнай паўзы.