«Спыніце найманне людзей»: АІ-кампанія няўдала прарэкламавала свае паслугі

Банер з надпісам «Годзе наймаць людзей» належыць кампаніі Artisan. Кампаніі два гады, у яе ўсяго 30 супрацоўнікаў і пакуль толькі адзін прадукт — АІ-агент па продажах, які аўтаматызуе пошук і першасны кантакт з патэнцыяльнымі кліентамі.

Плакаты з правакацыйнымі лозунгамі размешчаныя па ўсім горадзе на аўтобусных прыпынках і будынках. Сярод іх заявы аб тым, што боты Artisan «не скардзяцца на баланс паміж працай і асабістым жыццём» і ў іх ніколі не «не працуе камера» для сазвону ў Zoom. Некаторыя заклікі канкрэтнейшыя: «Наймайце [АІ-агентаў Artisan], а не людзей» і «Наступіла эра АІ-супрацоўнікаў».

Відавочна, кампанія прасоўвае аўтаматызацыю, але робіць гэта не зусім тактоўна, чым і наклікала крытыку скураных работнікаў. У адным са сваіх відэа Artisan заяўляе, што яе прадукт спраўляецца без суправаджэння чалавека і каштуе на 96% менш, чым калі плаціць заробак жывому супрацоўніку.

У сеціве кампанію назвалі «апакаліптычным кашмарам», таксама абмеркаванне разгарэлася на Reddit. Некаторыя каментатары жартам прапанавалі «нараджаць АІ-дзяцей замест сапраўдных», бо гэта «нашмат танней», хтосьці прапанаваў спаліць білборды, а хтосьці напісаў, што ў Сан-Францыска папросту ненавідзяць людзей.

У Artisan прызнаюць, што меседж рэкламных банераў можа палохаць, але адзначаюць, што такія ж пачуцці можа выклікаць і АІ, а таксама што фармат працы ў свеце ў цэлым мяняецца. Там дадалі, што кампанія выявілася вельмі эфектыўнай — пазнавальнасць брэнда павысілася, як і попыт на прадукт. «Нам трэба было штосьці, што прыцягне ўвагу, а сумнымі фразамі ўвагі не прыцягнеш», — сказалі ў Artisan. Гендырэктар кампаніі ў сябе ў Х запосціў плакат з надпісам, што АІ «не прыйдзе на працу пахмельным».

Акрамя продажаў, Artisan распрацоўвае АІ-асістэнтаў для маркетынгу, рэкрутынгу, дызайну і фінансаў.