Новае даследаванне паказала, што праца поруч з прамысловымі робатамі можа негатыўна ўплываць на псіхалагічны стан работнікаў. Многія сутыкаюцца з пачуццём страты сэнсу ў працы і стрэсам з-за неабходнасці падладжвацца пад тэмп машын.
Новае даследаванне паказала, што праца поруч з прамысловымі робатамі можа негатыўна ўплываць на псіхалагічны стан работнікаў. Многія сутыкаюцца з пачуццём страты сэнсу ў працы і стрэсам з-за неабходнасці падладжвацца пад тэмп машын.
Джэсіка, супрацоўніца Amazon, распавяла Financial Times, што працавала на высокатэхналагічным складзе, дзе робаты дастаўлялі ёй тавары для сартавання. Хаця фізічная нагрузка была меншай, чым на іншых пазіцыях, праца аказалася «шалёна сумнай». Джэсіка праводзіла да 12 гадзін, стоячы на месцы, і адчувала стрэс з-за хуткага тэмпу, які задавалі робаты. «Калі заказаў станавілася шмат, да тваёй станцыі выбудоўваліся 20 робатаў», — успамінае яна. Праз год яна перайшла ў менш аўтаматызаваны размеркавальны цэнтр Amazon, дзе тэмп павольнейшы, а зносіны з калегамі прасцейшыя.
Даследаванне Гронінгенскага ўніверсітэта, праведзенае ў 20 еўрапейскіх краінах, паказала, што ў галінах з высокім узроўнем рабатызацыі работнікі радзей адчуваюць сваю працу значнай і губляюць пачуццё аўтаноміі. «Робаты стандартызуюць і руцінізуюць працэсы, праз што ў работнікаў менш свабоды ў выбары задач і хуткасці іх выканання», — тлумачыць Мілена Нікалава, вядучы аўтар даследавання.
Аналіз Eurofound таксама пацвердзіў, што ўзаемадзеянне з робатамі ўзмацняе такія непажаданыя ўмовы, як павышаны кантроль і ізаляцыя. Даследаванне 2024 года ў Кітаі таксама паказала, што хаця робаты паляпшаюць фізічнае здароўе работнікаў, яны павышаюць псіхалагічны стрэс, асабліва праз страх страты працы.
Паводле дадзеных Міжнароднай федэрацыі робататэхнікі, у 2022 годзе толькі 3% еўрапейскіх работнікаў непасрэдна ўзаемадзейнічалі з робатамі, але іх выкарыстанне імкліва расце. Эксперт Мэт Бін адзначае, што аўтаматызацыя, асабліва ў нізкааплатных і пачатковых ролях, зніжае кваліфікацыю работнікаў, калі яна не ўкараняецца прадумана. Нават высокакваліфікаваныя спецыялісты, такія як пілоты дронаў або хірургі, якія выкарыстоўваюць рабатызаваныя сістэмы, адзначаюць, што іх праца становіцца больш бяспечнай, але больш сумнай і адчужанай.
Вытворцы робататэхнікі, такія як ABB і Fanuc, робяць акцэнт на стварэнні «чалавекацэнтрычных» калабаратыўных робатаў (коботаў) з інтуітыўным дызайнам і магчымасцю натуральнага ўзаемадзеяння з людзьмі. Fanuc падтрымлівае даследаванні па стварэнні «эмпатычных» робатаў, здольных рэагаваць на эмоцыі работнікаў. Amazon, са свайго боку, уводзіць міні-гульні для супрацоўнікаў, каб знізіць манатоннасць, і падкрэслівае, што іх 750 000 робатаў у размеркавальных цэнтрах распрацаваныя для бяспечнай супольнай працы з людзьмі.
Мілена Нікалава лічыць, што ключ да вырашэння праблемы — гэта ўцягванне работнікаў у працэс праектавання і ўкаранення аўтаматызацыі, а таксама іх перанавучанне для новых роляў. «Тэхналогіі не толькі выцясняюць людзей, але і ствараюць новыя магчымасці, пра якія мы пакуль не ведаем», — кажа яна.
Рэлацыраваліся? Цяпер вы можаце каментаваць без верыфікацыі акаўнта.