Маск знайшоў гендырэктарку для Twitter — яна прыступіць да працы праз паўтара месяца

Сам бізнэсовец зойме пасаду старшыні праўлення і тэхнічнага дырэктара. Ён будзе адказваць за развіццё прадукту, праграмнае забеспячэнне і працу ключавых сістэм.

Імя новай персоны Маск не называе. Паводле паведамлення Wall Street Journal, ёю будзе кіраўніца аддзела рэкламы і партнёрстваў медыякампаніі NBCUniversal Лінда Якарына. Цяпер сацсетка вядзе перамовы з ёю.

Раней Маск заяўляў, што гатовы сысці з пасады генеральнага дырэктара прыналежнай яму сацсеткі, як толькі падбярэ прыдатную кандыдатуру — чалавека, які «дастаткова дурны», каб пагадзіцца на гэтую працу. Insider адзначае, што Якарына ў гутарках з сябрамі выяўляла цікавасць да Twitter і магчымасці ўзначаліць платформу.

Прэс-служба Twitter на запыты ўсіх медыйных выданняў па-ранейшаму адказвае какашкай.