Маск зноў заблакаваў Канье Уэста. Той прызнаўся ў сімпатыі да Гітлера

1 снежня падчас інтэрв’ю з канспіролагам і тэлевядоўцам Алексам Джонсам рэпер назваў сябе нацыстам і сказаў, што яму падабаецца Гітлер. «Не дазволена адкрыта казаць, што гэты чалавек зрабіў штосьці добрае, і мне гэта надакучыла. Кожная чалавечая істота мае штосьці каштоўнае, што яна прыўносіць у свет. Асабліва Гітлер <…> Гэты хлопец вынайшаў шашу і той самы мікрафон, які я выкарыстоўваю як музыка», — заявіў ён.

Пасля эфіру Уэст апублікаваў серыю твітаў, у якіх выкарыстаў свастыкі ўнутры зоркі Давіда. Перад тым як Ілан Маск анансаваў блакаванне яго акаўнта, рэпер апублікаваў пост, у якім прапанаваў запомніць гэта як яго «апошні твіт». Да яго Уэст прымацаваў фатаграфію, на якой Маска абліваюць са шланга на яхце.

Услед за Маскам кіраўніцтва сацсеткі Parler абвясціла пра скасаванне ўгоды па продажы кампаніі рэперу. Раней у кастрычніку Twitter наклаў часовыя абмежаванні праз антысеміцкія твіты рэпера. Калі Маск набыў сацсетку, рэперу вярнулі доступ да ўліковага запісу.