Маск запусціў сваю замену «Вікіпедыі»

Як піша The Verge, яна мае шмат агульнага з арыгіналам. У яе вельмі просты дызайн, хатняя старонка ўяўляе сабой велізарны радок пошуку, артыкулы маюць тую ж структуру, што і «Вікіпедыя» — з загалоўкамі, падзагалоўкамі і цытатамі. Малюнкаў у ёй, здаецца, няма. Рэдагаваць старонкі карыстальнікі таксама не могуць, прынамсі, зараз. Журналістам The Verge такая кнопка сустракалася толькі на некалькіх старонках, але пры націсканні паказваўся толькі спіс ужо ўнесеных правак без указання таго, хто менавіта іх зрабіў. Прапанаваць свае не атрымалася.

У цяперашняй версіі Grokipedia 885 тысяч артыкулаў — «Вікіпедыя» налічвае каля 7 млн толькі на англійскай, але яна і існуе больш за 20 гадоў. Таксама ў артыкулах Grokipedia адзначаецца, што яны прайшлі фактчэкінг (і калі менавіта). Яго праводзіў Grok, што забаўна з улікам таго, як чат-боты галюцынуюць і маніпулююць карыстальнікамі і інфармацыяй.

Маск заяўляў, што Grokipedia будзе «значна лепшай» за «Вікіпедыю», але некаторыя артыкулы ў ёй практычна цалкам спісаны з арыгіналу. У некаторых у самым нізе адкрыта сказана, што гэта — адаптаваныя матэрыялы «Вікіпедыі».

У «Вікіпедыі» сказалі, што без яе не можа абысціся нават Grokipedia. Там зараз разбіраюцца, як уладкавана энцыклапедыя Маска. The Verge адзначае, што месяц таму Grok ужо быў падлоўлены на цытаванні «Вікіпедыі» — мільярдэр тады паабяцаў да канца года ўсё выправіць. Зрэшты, не ўсе артыкулы Grokipedia абапіраюцца на яе прататып, а змест некаторых досыць спрэчны.