Meta будзе звальняць за ўцечкі інфармацыі. Калі зловіць за руку

Галоўны спецыяліст інфармацыйнай бяспекі Meta Гай Розен у сваім унутраным мемарандуме заявіў, што кампанія сур’ёзна ставіцца да ўцечак і будзе прымаць меры. Розен падкрэсліў, што ўцечка інфармацыі не толькі ўплывае на бяспеку, але і дэмаралізуе каманды і адымае час, які мог быць выдаткаваны на распрацоўку прадуктаў.

Розен таксама заявіў, што Meta будзе рабіць адпаведныя захады, уключаючы звальненне, у выпадку, калі знойдзе вінаватых ва ўцечках. Ён паведаміў, што нядаўна кампанія звольніла супрацоўнікаў, якія выдавалі канфідэнцыйную інфармацыю і перадавалі сакрэтныя дакументы.

У часе агульнага сходу Цукерберг паведаміў супрацоўнікам, што праз пастаянныя ўцечкі ён больш не будзе такім адкрытым у камунікацыі. «Мы стараемся быць сапраўды адкрытымі, але потым усё, што я кажу, выцякае», — сказаў бізнэсовец.

Тэхнічны дырэктар Meta Эндру Босварт, у сваю чаргу, апублікаваў спасылку на артыкул пра ўцечку сустрэчы Цукерберга ў групе «Давайце паправім Meta» на ўнутраным форуме для супрацоўнікаў. Ён адзначыў, што разумее незадаволенасць супрацоўнікаў праз змену фармату камунікацыі, але лічыць, што гэта было правільным рашэннем праз сітуацыю, якая склалася з уцечкамі.