Meta рыхтуе новыя звальненні, прыпыніла планаванне бюджэтаў, застопарыла працу

Паводле аповеду двух супрацоўнікаў Meta, апошнімі тыднямі ў кампаніі незразумела, што будзе з бюджэтамі і колькасцю штату. Некаторыя людзі прастойваюць, бо менеджары не могуць спланаваць нагрузку.

Праекты і рашэнні, на адабрэнне якіх раней сыходзілі лічаныя дні, цяпер могуць займаць да месяца — нават у прыярытэтных кірунках, такіх як метасусвет і рэклама.

Адная з крыніц выдання называе сітуацыю, што склалася, «хаосам». «„Год эфектыўнасці“ пачаўся з таго, што людзі атрымліваюць заробак, нічога не робячы», — адзначыў ён.

Раней Марк Цукерберг абвясціў 2023-ы «годам эфектыўнасці» ў рамках скарачэння выдаткаў Meta. Таксама ён мае намер зрабіць іерархію кампаніі больш плоскай і пазбавіцца ад «менеджараў, якія кіруюць менеджарамі», каб паскорыць працэс прыняцця рашэнняў. Акрамя гэтага, кампанія будзе больш рашуча пазбаўляцца ад непрыярытэтных праектаў, якія не апраўдваюць чаканняў.

Летась Meta анансавала звальненне 11 тысяч супрацоўнікаў, або прыкладна 13% свайго штату. Суразмоўцы FT кажуць, што скарачэнні і нявызначанасць дэмаралізавалі і дэматывавалі астатніх людзей. Нягледзячы на гэта, прыкладна ў сакавіку чакаюцца новыя скарачэнні, а цяпер, паводле інфармацыі дзейных і былых супрацоўнікаў, там праводзяцца перфоманс-рэв’ю.

У Meta адмовіліся ад каментароў.