У ЗША адбыўся гучны судовы працэс, дзе сацсеткі паспрабавалі прыцягнуць да адказнасці не за кантэнт, а за сам дызайн платформаў. І прысяжныя сталі на бок карыстальніка, піша TechCrunch.
У ЗША адбыўся гучны судовы працэс, дзе сацсеткі паспрабавалі прыцягнуць да адказнасці не за кантэнт, а за сам дызайн платформаў. І прысяжныя сталі на бок карыстальніка, піша TechCrunch.
Суд у Лос-Анджэлесе прызнаў Meta і Google віноўнымі ў халатнасці па справе аб шкодзе сацсетак для псіхічнага здароўя падлетка. Пазаўніком выступала дзяўчына па імені Кэйлі, якой зараз 20 гадоў. Яна сцвярджала, што ў падлеткавым узросце ў яе з’явілася залежнасць ад Instagram і YouTube, што прывяло да трывожнасці, дэпрэсіі і расстройства, звязанага з успрыманнем свайго цела.
Прысяжныя вырашылі, што кампаніі нясуць адказнасць — не за канкрэтныя пасты, а за тое, як уладкаваны іх платформы. У судзе абмяркоўвалі, напрыклад, бясконцую стужку і іншыя механікі, якія прымушаюць карыстальнікаў праводзіць у аплікацыях больш часу. Суд абавязаў кампаніі выплаціць каля $6 млн: прыкладна $4,2 млн павінна заплаціць Meta і $1,8 млн — Google.
Юрысты спрабавалі даказаць, што кампаніі ведалі пра рызыкі для падлеткаў. У судзе паказвалі ўнутраныя дакументы, паводле якіх кампаніі вывучалі, наколькі іх сэрвісы могуць выклікаць залежнасць у маладых карыстальнікаў, і пры гэтым працягвалі ўкараняць рашэнні, якія павышаюць уцягнутасць. Кіраўнікі кампаній, уключаючы кіраўніка Meta Марка Цукерберга, давалі паказанні і абаранялі рашэнні кампаніі — напрыклад, адмену часовай забароны на б’юці-фільтры, якія ўнутры кампаніі лічылі патэнцыйна шкоднымі для дзяўчат-падлеткаў.
Гэтая справа лічыцца паказальнай — свайго роду тэставым працэсам для тысяч аналагічных пазоваў, якія зараз разглядаюцца ў судах Каліфорніі. У апошнія гады ў ЗША расце ціск на тэхнакампаніі з-за ўплыву сацсетак на дзяцей і падлеткаў. Заканадаўства не паспявае за тэхналогіямі, таму барацьба ўсё часцей пераносіцца ў суды.
Кампаніі з рашэннем не згодны і будуць падаваць апеляцыі. Але сам вердыкт ужо можа мець наступствы для ўсёй індустрыі: калі суды пачнуць прызнаваць, што шкоду можа прычыняць уладкаванне платформаў, а не толькі кантэнт, сацсеткам, магчыма, прыйдзецца мяняць алгарытмы, інтэрфейсы і механікі ўцягнення, нават калі гэта запаволіць іх бізнес.
Релоцировались? Теперь вы можете комментировать без верификации аккаунта.