Алеся Чапкевич bel 19 сакавіка 2026, 11:56

У Беларусі перасталі расці сацсеткі. Акрамя адной, яна бамбанула

У Беларусі ўпершыню за доўгі час многія сацсеткі перасталі расці — акрамя Threads. Пра гэта Office Life расказалі спецыялісты галіны.

Пакінуць каментарый

У Беларусі перасталі расці сацсеткі. Акрамя адной, яна бамбанула

У Беларусі ўпершыню за доўгі час многія сацсеткі перасталі расці — акрамя Threads. Пра гэта Office Life расказалі спецыялісты галіны.

У 2025 годзе агульны рост аўдыторыі ў беларускіх сацсетках практычна спыніўся. Выключэннем стаў толькі Threads, які за паўгода вырас у 3 разы.

Абсалютны лідар па ахопах — TikTok, які пераступіў мяжу амаль у 9 млн карыстальнікаў. Падкрэсліваецца, што не колькасць насельніцтва, бо многія заходзяць з некалькіх прылад, але лічба ўсё роўна «каласальная». Эксперты мяркуюць, што гэтая тэндэнцыя будзе толькі ўзмацняцца.

Паводле дадзеных DataReportal, за год аўдыторыя сацсетак з Беларусі вырасла на 13%. TikTok выкарыстоўваюць 95% інтэрнэт-карыстальнікаў. Нягледзячы на рост платформы, яго тэмпы запавольваюцца — патэнцыял пашырэння амаль вычарпаны.

Далей ідзе YouTube, па якім празрыстай беларускай статыстыкі няма, а за ім — Instagram з 3,9 млн. Гэта менш, чым у TikTok, але тут важны час знаходжання: людзі заходзяць у Instagram дзясяткі разоў на дзень, гартаюць стужку, глядзяць рылсы, а гэта — ключавы фактар для рэкламадаўцаў. Instagram у Беларусі ўтрымлівае стабільныя пазіцыі з ахопам 64%, але рост ужо не выбуховы, а хутчэй арганічны і інерцыйны.

Усё, што не трапляе ў топ-3, альбо стаіць на месцы, альбо падае. Напрыклад, колькасць карыстальнікаў Facebook у Беларусі знізілася, па ацэнках суразмоўцаў парталу, прыкладна да 500 тысяч. На гэтую сацсетку прыходзіцца 11% аўдыторыі, і гэта ўжо не масавая пляцоўка, а нішавая. Facebook застаецца рэлевантным для складаных і «дарагіх» ніш, а таксама для карыстальнікаў, арыентаваных на міжнародную супольнасць.

Сюрпрызам года для экспертаў стаў LinkedIn. Па іх ацэнках, месячная аўдыторыя дзелавой сацсеткі ў Беларусі ўжо дасягнула 2 млн чалавек. Таксама беларусы яшчэ сядзяць у «УКантакце» (ніжэй 2 млн) і ў «Аднакласніках» (каля 1 млн), але гэтыя сеткі стагнуюць.

Галоўнай зоркай у свеце беларускіх сацсетак стаў Threads. Да лістапада 2025 года яго аўдыторыя была 450 тысяч, а да гэтага сакавіка ўжо пераступіла парог у мільён карыстальнікаў. Эксперты тлумачаць папулярнасць платформы так:

«Чым Threads адрозніваецца ад усяго, што мы бачылі раней? Калі праводзіць аналогіі, то TikTok — гэта гіганцкі футбольны манеж. Там 9 млн чалавек, шум, штурханіна, ролікі лятаюць ва ўсе бакі. Каб вас заўважылі ў гэтым манежы, трэба крычаць вельмі гучна і пажадана рабіць сальта. А Threads — гэта такая невялікая курылка, дзе збіраюцца толькі свае, і навіны разносяцца імгненна», — параўноўваюць яны.

Але лічаць, што Threads не «заб’е» Instagram або не заменіць TikTok у плане прасоўвання для брэндаў: «Зумеры і альфы гатовыя выкарыстоўваць столькі платформаў, колькі патрэбна. Яны ў адным месцы гуляюць, у другім стрымяць, у трэцім з аднакласнікамі перапісваюцца». Таму Threads для брэндаў называюць не заменай іншых платформаў, а добрым дапаўненнем, калі навучыцца ім граматна карыстацца.