Meta пачала скарачаць айцішнікаў, тысячы чалавек

Колькі менавіта супрацоўнікаў патрапіць «пад нож», невядома. Крыніцы Vox напярэдадні паведамлялі, што працу ў Meta страцяць каля 4 тысяч.

У сакавіку Meta абвясціла пра планы скараціць 10 тысяч супрацоўнікаў у дадатак да тых 11 тысяч, што былі скарочаныя ў лістападзе. Кіраўнік кампаніі Марк Цукерберг адзначыў, што новыя скарачэнні пройдуць у тры этапы. Першымі пацярпелі рэкруцёры, іх сталі апавяшчаць пра звальненне адразу ж. Другая хваля мелася закрануць тэхнічных спецыялістаў і прызначалася на канец красавіка, а трэцяя мусіла дакаціцца да бізнэс-сегмента (фінаддзела, юрыстаў, эйчараў) у маі.

Паводле інфармацыі CNBC, сярод скарочаных айцішнікаў апынуліся распрацоўшчыкі софту, UX-распрацоўшчыкі, а таксама распрацоўшчыкі віртуальнай і дапоўненай рэальнасці.

На навінах пра масавыя звальненні каціроўкі Meta ад пачатку года падскочылі на 81%. Летась кампанія страціла прыкладна 2/3 рынкавай капіталізацыі.