Meta паказала палепшаную версію АІ-генератара кода Code Llama

Code Llama паказалі ў жніўні мінулага года. Сэрвіс бясплатны для даследчага і камерцыйнага выкарыстання. Абноўлены варыянт мадэлі можа апрацоўваць больш запытаў, ніж папярэдняя версія. Ён навучаны на 1 Тбайт праграмнага кода і звязаных з ім даных. У тэсце HumanEval ён паказаў 53% дакладнасці. Напрыклад, у гэтым жа тэсце GPT-3.5 паказвае 48,1% дакладнасці, GPT-4 дасягае 67%.

«Мы выпускаем новую палепшаную версію Code Llama, якая ўключае звыш 70 млрд параметраў. Я ганаруся прагрэсам у гэтым кірунку і з нецярпеннем чакаю ўключэння гэтых удасканаленняў у Llama 3 і будучыя мадэлі», — напісаў у сваім акаўнце гендырэктар Meta Марк Цукерберг.

Code Llama 70B даступны ў трох версіях генератара кода і дагэтуль бясплатны для распрацоўшчыкаў. Акрамя таго, раней Meta запусціла дадатковыя мадэлі Code Llama — Python і Code Llama — Instruct, прызначаныя для канкрэтных моў праграмавання. Акрамя таго, выйшлі мадэлі для генерацыі праграмнага кода і ў іншых кампаній: напрыклад, сэрвіс Amazon CodeWhisperer, GitHub Copilot на базе нейрасеткі OpenAI ад Microsoft.