Microsoft хоча перарабіць GitHub, каб адбіцца ад канкурэнтаў у ШІ

Усё пачалося з ідэі, якая калісьці раздражняла Біла Гейтса.

«Біл заўсёды казаў: ёсць толькі адна катэгорыя — кіраванне інфармацыяй. Яго злавала, што для дакументаў, сайтаў і стварэння аплікацый патрэбныя розныя інструменты», — распавёў на ўнутранай сустрэчы CEO Microsoft Сацья Надэла.

На яго думку, ШІ сцірае гэтыя межы: «У свеце ШІ няма розніцы паміж аплікацыяй, дакументам і сайтам».

GitHub, які Microsoft купіла ў 2018 годзе, доўга заставаўся лідарам дзякуючы каласальнай базе кода і супрацоўніцтву з OpenAI. Але за апошні год распрацоўшчыкі пачалі актыўна сыходзіць да больш гнуткіх інструментаў накшталт Cursor. Па дадзеных аналітыкаў, нават фірмовы GitHub Copilot губляе долю на рынку.

Каб вярнуць лідарства, Microsoft хоча зрабіць GitHub «цэнтрам прыцягнення» для ўсёй ШІ-распрацоўкі, а не проста сховішчам рэпазіторыяў.

«Распрацоўшчыкі больш не прыходзяць на GitHub проста захоўваць код. Мы хочам, каб гэта стала цэнтрам усёй экасістэмы распрацоўкі з дапамогай ШІ», — сказаў Джэй Парых, які ўзначаліў новае падраздзяленне CoreAI, куды цяпер уваходзіць GitHub.

Ідэя ў тым, каб інструменты GitHub працавалі ўсюды — у кансолі, браўзеры, VS Code і іншых асяроддзях, а таксама ўнутры прадуктаў Microsoft. Акрамя таго, кампанія хоча ператварыць GitHub у панэль кіравання для мноства ШІ-агентаў.

Апроч вялікіх планаў, Microsoft пракачвае базу: паскарае GitHub Actions (аўтаматызацыю зборкі і разгортвання), дадае аналітыку і паляпшае бяспеку. Па словах Парыха, каманда зараз абнаўляе сэрвісы амаль штодзённа. «Мы выпускаем абнаўленні хутчэй, чым калі-небудзь. Рыхтуемся да лепшай GitHub Universe у гісторыі», — нагадаў ён пра будучую канферэнцыю.

Парых таксама падтрымаў пазіцыю кіраўніка Microsoft AI Мустафы Сулеймана ў тым, што кампанія павінна працаваць з рознымі моўнымі мадэлямі, а не спадзявацца толькі на OpenAI. «Мы хочам, каб распрацоўшчыкі маглі выбіраць — дзе працаваць, як працаваць і з якімі мадэлямі», — адзначыў ён.

Усё гэта — частка больш шырокай стратэгіі Microsoft. Кампанія абнаўляе Visual Studio і нават ацэньвае супрацоўнікаў па тым, як яны выкарыстоўваюць ШІ ў працы.

У выніку GitHub павінен ператварыцца з проста платформы для кода ва ўніверсальную ШІ-пясочніцу, дзе распрацоўшчыкі змогуць пісаць, тэставаць і запускаць прадукты ў любым асяроддзі і з любымі мадэлямі.

У CEO GitHub ёсць месэдж для распрацоўшчыкаў ва ўсім свеце: альбо працуйце з ШІ, альбо сыходзьце з прафесіі

Па тэме

У CEO GitHub ёсць месэдж для распрацоўшчыкаў ва ўсім свеце: альбо працуйце з ШІ, альбо сыходзьце з прафесіі