Microsoft: расійскія хакеры рыхтуюць масіраваную кібератаку на Украіну

Аналітыкі мяркуюць, што іх мэта — разбуральны ўплыў і збор разведвальнай інфармацыі пра грамадзянскія і ваенныя аб’екты Украіны і яе партнёраў. Паводле слоў аўтараў справаздачы, адная з груп, «падобна, рыхтуецца да новай дэструктыўнай кампаніі». У публікацыі пазначана, што асабліва актыўная расійская хакерская каманда пад назвай Sandworm.

Даследнікі заўважылі, што Sandworm выпрабоўвае «дадатковыя магчымасці праграм-вымагальнікаў, якія могуць быць выкарыстаныя для разбуральных нападаў на арганізацыі па-за межамі Украіны, якія выконваюць ключавыя функцыі ў ланцужках паставак».

Таксама Microsoft выявіла па меншай меры дзевяць розных «чысцільшчыкаў» і два тыпы праграм-вымагальнікаў, якія выкарыстоўваліся супраць больш як ста ўкраінскіх арганізацый, пачынаючы ад студзеня 2022 года. Таксама вырасла колькасць схаваных расійскіх кібераперацый, накіраваных на кампраметацыю ўкраінскіх арганізацый у заходніх краінах.