Microsoft скарачае 9 тысяч супрацоўнікаў — другі раўнд у гэтым годзе

Прадстаўнік Microsoft патлумачыў выданню, што новыя скарачэнні закрануць прыкладна 4% штату тэхгіганта. Яны пракоцяцца па супрацоўніках з розным узроўнем досведу, у розных камандах і лакацыях. Мэта — спрасціць працэсы і ліквідаваць лішнія пласты менеджараў.

«Мы працягваем праводзіць арганізацыйныя змены, якія неабходны, каб стварыць кампаніі і камандам найбольш спрыяльныя ўмовы для поспеху на дынамічным рынку», — адзначыў ён.

Нядаўна паведамлялася, што Microsoft плануе новыя звальненні ў шэрагах спецыялістаў па продажах і ў гульнявым аддзеле Xbox. У маі кампанія скараціла 6 тысяч чалавек — найбольш пацярпелі супрацоўнікі на інжынерных і прадуктовых пазіцыях. Яшчэ некалькі сотняў страцілі працу ў чэрвені.