Мінюст ЗША падаў пазоў на Google праз дамінаванне на рынку інтэрнэт-рэкламы

«Сёння Міністэрства юстыцыі сумесна з генеральнымі пракурорамі Каліфорніі, Каларада, Канектыкута, Нью-Джэрсі, Нью-Ёрка, Род-Айленда, Тэнесі і Вірджыніі падало грамадзянскі антыманапольны пазоў супраць Google праз шматлікія выпадкі манапалізацыі лічбавых рэкламных прадуктаў», — гаворыцца ў заяве ведамства.

На думку Мінюста, «Google выкарыстоўвала антыканкурэнтныя і незаконныя сродкі для прадухілення любой пагрозы свайму дамінаванню над лічбавымі рэкламнымі тэхналогіямі». Амерыканскія ўлады патрабуюць ад Google прадаць сваё праграмнае забеспячэнне па рэкламе. У 2021 годзе рэклама складала каля 12% прыбытку кампаніі.

Google лічыць, што пазоў можа прывесці да паслаблення інавацый, росту цэн на рэкламу ў інтэрнэце і ўскладніць працу для тысяч малых кампаній, якія маглі прасоўвацца пры дапамозе рэкламы. Раней у сакавіку Мінюст падаў пазоў супраць Google і абвінаваціў кампанію ў тым, што яна неналежным чынам выкарыстоўвала юрыдычныя прывілеі для абароны канфідэнцыйнасці ўнутраных паведамленняў.