Маладыя фаўндары з Крамянёвай даліны адмаўляюцца ад алкаголю. Здагадайцеся, навошта

Амерыканцы ў цэлым п’юць менш. Па прагнозах Bank of America, спажыванне алкаголю на душу насельніцтва ў ЗША ў 2025 годзе зменшыцца ў параўнанні з 2024-м ужо чацвёрты год запар. Моладзь узначальвае гэты трэнд: апытанне Gallup 2023 года паказала, што алкаголь ужываюць 62% людзей маладзейшых за 35 гад — на 10% менш, чым 20 гадоў таму.

У Крамянёвай даліне гэтая тэндэнцыя ўзмацняецца жорсткай працоўнай культурай стартапаў, дзе з-за доўгіх працоўных гадзін застаецца менш часу на вечарыны. Акрамя таго, здаровы лад жыцця прасоўваюць папулярныя блогеры накшталт заснавальніка Braintree Брайана Джонсана, які змагаецца са старэннем, і Эндру Хубермана, якія раяць адмовіцца ад шкодных звычак. Хоць гэта не азначае, што сярод маладых прадпрымальнікаў няма тых, хто п’е рэгулярна ці шмат.

26-гадовы сузаснавальнік TrainLoop Джэксан Стокс расказаў, што нядаўна вячэраў з іншымі заснавальнікамі стартапаў прыкладна свайго ўзросту. Большасць піла адзін напой, і калі адзін з сяброў замовіў усім па шоту, гэта было ўспрынята без энтузіязму. Стокс адзначае, што хоць справа была ў пятніцу вечарам, ніхто не хацеў псаваць наступную раніцу, і моцны алкаголь тут лічаць «шкодным фактарам».

Сузаснавальнік стартапа Crustdata з Y Combinator Крыс Пісарскі на мерапрыемствах акселератара заўважыў, што большасць людзей былі цвярозымі: «Магчымасці выпіць былі, але бар стаяў пусты», — здзіўляўся ён. Пісарскі кажа, што «вельмі рэдка» п’е — адзін келіх віна на месяц. Такі адказ быў тыповым для апытаных заснавальнікаў: не поўная адмова, але надзвычай рэдкае ўжыванне алкаголю.

Многія з тых, хто амаль не п’е, спасылаліся на тое, што трэба шмат працаваць і захоўваць канцэнтрацыю. У кагорце Y Combinator сузаснавальніка Docket Барыса Скурыхіна фаўндэры часта казалі, што ім трэба «зафіксавацца» (lock in). «Гэта значыць працаваць доўгія гадзіны, адмаўляючыся ад празмерна актыўнага сацыяльнага жыцця і алкаголю. Асабліва ў перыяд праграмы некаторыя дамаўляліся выдаткоўваць час толькі на сон і працу», — кажа ён.

Сузаснавальніца Fort Міранда Новер адзначае, што для маладых прадпрымальнікаў важны імідж: «Калі ты заснавальнік софтвернага стартапа, B2B SaaS ці ШІ-кампаніі, табе трэба паказаць: мы шэсць дзён на тыдні ў офісе, працуем да 9 вечара, не п’ём, не тусуемся — у нас іншыя справы».

Сузаснавальнік CTGT Сірыл Горла лічыць алкаголь «атрутай». Ён кажа, што калі працуеш па 80-90 гадзін на тыдзень, алкаголь перашкаджае. Яшчэ адна прычына зніжэння спажывання алкаголю ў Даліне — павышаная ўвага да здароўя. «Тваё цела — гэта храм», — сказаў ён. Суразмоўцы Business Insider таксама пералічвалі дабаўкі, якія прымаюць, і дэманстравалі смарт-кольцы Oura, якія дапамагаюць адсочваць актыўнасць і стан арганізма.

Сузаснавальнік Curo Кіран Уайт сказаў, што не п’е з юнацтва, і параўнаў працу заснавальніка з кар’ерай прафесійнага спартсмена: «Ты заўсёды павінен быць у форме». Другі кофаўндар стартапа Эндру Портэр таксама абмежаваў спажыванне алкаголю мерапрыемствамі з венчурнымі інвестарамі і сустрэчамі для наладжвання кантактаў — ён увесь у працы і на вечарынкі не ходзіць.

Як піша выданне, свой уплыў могуць мець рэгіянальныя фактары. Каліфорнія вядома як цэнтр аздараўленчых трэндаў, асабліва ў буйных гарадах. Портэр п’е больш у Нью-Ёрку, чым у Сан-Францыска. Уайт адзначыў, што ў Вялікабрытаніі культура спажывання алкаголю іншая. Некаторыя стартаперы цалкам адмаўляюцца ад алкаголю, знаходзячыся ў Даліне.

Мяркуючы па расповедах маладых заснавальнікаў, неўтаймаваная культура вечарынак часоў ранняга Facebook амаль знікла — прынамсі, у частцы алкаголю. Сузаснавальніца Bond Хлоі Самаа кажа, што ўсё яшчэ ходзіць на хатнія вечарынкі, але ўсё часцей бачыць у людзей у руках газіроўку. Горла параўнаў культуру цвярозых вечарынак з «інтэлектуальнымі размовамі» падпольных бараў эпохі сухога закону 1920-х гадоў: «Гэта рухаецца ў бок сходаў інтэлігенцыі. Мы рэальна шмат чаго паспяваем. У нас былі сустрэчы, на якіх мы знаходзілі новых супрацоўнікаў».

У Сан-Францыска ўсе пачалі хадзіць з ШІ-дыктафонамі

Па тэме

У Сан-Францыска ўсе пачалі хадзіць з ШІ-дыктафонамі

Не толькі каранавірус: у ЗША і Еўропе шырыцца забойчы кітайскі рэжым працы «996»

Па тэме

Не толькі каранавірус: у ЗША і Еўропе шырыцца забойчы кітайскі рэжым працы «996»