Новы трэнд у праграмаванні: ШІ-кодынг пераходзіць з рэдактараў у тэрмінал

Яшчэ нядаўна стандартам лічыліся ШІ-асістэнты кшталту Cursor, Windsurf і GitHub Copilot, інтэграваныя ў візуальныя асяроддзі. Але па меры развіцця ШІ-агентаў і вайб-кодынгу буйныя распрацоўшчыкі робяць стаўку на тэрмінал.

Сёлета адразу тры вядучыя гульцы — Anthropic, DeepMind і OpenAI — выпусцілі ўласныя інструменты для каманднага радка (Claude Code, Gemini CLI і CLI Codex). Паводле дадзеных кампаній, яны хутка сталі аднымі з самых папулярных прадуктаў.

Як адзначае Зак Ллойд, заснавальнік Warp (інструмента-лідара рэйтынгу Terminal-Bench), тэрмінал — «самы ўніверсальны ўзровень у стэку распрацоўшчыка». У ім агенты здольны вырашаць задачы, якія не па плячы рэдактарам кода, уключаючы разгортванне аплікацый.

Замест таго, каб проста выпраўляць багі (як у традыцыйных бэнчмарках SWE-Bench), асістэнты ў тэрмінале сутыкаюцца з задачамі, якія патрабуюць комплекснага падыходу.

Напрыклад, ім трэба сабраць ядро Linux з нуля, самастойна загрузіўшы зыходнікі, або напісаць алгарытм распакоўкі, зыходзячы толькі з гатовага архіватара. Такія заданні правяраюць не толькі веданне кода, але і уменне разбірацца ў навакольным асяроддзі.

Паводле слоў стваральнікаў Terminal-Bench, нават самыя прасунутыя мадэлі спраўляюцца толькі з паловай падобных задач — настолькі яны складаныя. Усё гэта адкрывае дарогу новым агентам для тэрмінала.

На думку экспертаў, ужо сёння такія інструменты здольныя браць на сябе значную частку рутынных задач па наладцы і запуску праектаў. Галоўная стаўка — што ў будучыні да 95% узаемадзеянняў ШІ і кампутара будуць адбывацца менавіта праз тэрмінал.