Стрымінгавы сэрвіс даў справаздачу аб росце колькасці падпісчыкаў, нягледзячы на забарону на бясплатны абмен паролямі. Таксама кампанія адмовілася ад базавага тарыфу без рэкламы, прапаноўваючы карыстальнікам плаціць больш.
Стрымінгавы сэрвіс даў справаздачу аб росце колькасці падпісчыкаў, нягледзячы на забарону на бясплатны абмен паролямі. Таксама кампанія адмовілася ад базавага тарыфу без рэкламы, прапаноўваючы карыстальнікам плаціць больш.
Паводле даных апошняй фінансавай справаздачы, відэасэрвіс застаўся ў плюсе па выніках другога квартала. Выручка вырасла на 3% і дасягнула $8,19 мільярда, чысты прыбытак кампаніі склаў $1,49 мільярда. Колькасць падпісчыкаў за квартал вырасла на 5,9 мільёна чалавек і дасягнула 238,4 мільёна карыстальнікаў, што на 8% больш, ніж годам раней. Такая бадзёрая статыстыка моцна здзівіла індустрыю — усе чакалі правалу пасля ўведзенай забароны на шэрынг пароляў.
У красавіку мінулага года Netflix паведаміў, што ўпершыню за дзесяць гадоў колькасць падпісчыкаў скарацілася — адразу на 200 тысяч чалавек. Тады акцыі кампаніі патаннелі на 30%. Кіраўніцтва стрымінгу вырашыла не чакаць імклівага падзення даходаў і выціснуць з карыстальнікаў максімум. Раней карыстальнікі Netflix гадамі карысталіся шчылінай з абменам паролямі, якая дазваляла карыстацца агульнымі акаўнтамі і не плаціць паасобку за падпіскі. У кампаніі быў нават рэкламны слоган: Love is sharing a password. Але часы змяніліся.
Кампанія ўжыла жорсткую стратэгію. Сэрвіс увёў забарону на абмен паролямі ў больш як сотні краін, на якія прыпадае каля 80% падпісчыкаў. Падпісчыкі стандартнага плана цяпер могуць дадаць аднаго чалавека за $7,99 на месяц, а ўладальнікі Netflix Premium — дваіх, але па $7,99 за кожнага. Ва ўладальнікаў базавай падпіскі з рэкламай такой опцыі няма. Як выявілася, новая стратэгія атрымалася паспяховай, таму кампанія распаўсюдзіць забарону на пазасталыя краіны.
Таксама Netflix перагледзеў сваю тарыфную сетку. Сэрвіс адмовіўся ад базавага тарыфу без рэкламы ў ЗША і Вялікабрытаніі, раней яго прыбралі ў Канадзе. Раней ён каштаваў $10 і дазваляў глядзець кантэнт у якасці 720p на адной прыладзе. Старыя карыстальнікі застануцца на базавым тарыфе, пакуль не вырашаць змяніць яго. Новыя гледачы ўжо не змогуць яго абраць у наладах уліковага запісу. Хутчэй за ўсё, у астатніх краінах базавы тарыф стане недаступны найбліжэйшымі месяцамі.
Наўзамен новыя карыстальнікі змогуць аформіць даражэйшы стандартны тарыф за $15,5. Ён дае магчымасць глядзець кантэнт у якасці 1080p на чатырох прыладах адначасова. Такім чынам сэрвіс спрабуе падштурхнуць гледачоў набываць самы танны тарыф з рэкламай, каб павялічыць рэкламныя даходы.
Таксама кіраўнікі Netflix прапанавалі рэкламадаўцам стварыць новыя тыпы рэкламы, якія маглі б выкарыстоўваць у лічбавым сэрвісе. Кампанія прапанавала фармат 30-хвіліннага рэкламнага роліка, які мог бы паказвацца як серыял на працягу некалькіх дзён, а серыі абнаўляліся б кожны раз, як карыстальнік пачынаў глядзець новае шоу.
Netflix паспяшаўся супакоіць інвестараў, каб яны не надта радаваліся такому павароту падзей. Кампанія наўмысна не стала паказваць, колькі менавіта выручкі атрымала ад дзеяння забароны на шэрынг пароляў і перагляду тарыфнага плану. Аднак сэрвіс чакае, што колькасць платных падпісчыкаў у трэцім квартале будзе такой жа, як і ў другім, а рост выручкі ў чацвёртым квартале «прыкметна паскорыцца».
«Гэта не аднадзённая рэч», — заявіў са-генеральны дырэктар Netflix Грэг Пітэрс. «Часткова праз змены, якія ўводзяцца паступова, часткова праз тое, што некаторыя карыстальнікі не адразу рэгіструюць свой уліковы запіс, а робяць гэта на працягу наступнага месяца, трох, шасці або нават даўжэй, калі мы запускаем шоу, якое іх асабліва цікавіць», — лічыць Пітэрс.
Асабліва паказальным стала становішча Netflix на фоне глабальнага страйку акцёраў і сцэнарыстаў у Галівудзе, які ўдары па фінансавым становішчы студый. Аналітыкі мяркуюць, што стрымінгавая галіна атрымае выгаду ад крызісу за кошт зліцця і набыцця кантэнту. Са-генеральны дырэктар Netflix Тэд Сарандас заявіў, што кампанія вывучае магчымасць набываць аўтарскія правы на чужыя шоу і плануе стварыць сваю бібліятэку кантэнту. Гэта дапаможа перажыць падобныя страйкі і прыпыненні вытворчасці ў будучыні.
Рэлацыраваліся? Цяпер вы можаце каментаваць без верыфікацыі акаўнта.