«Яны не спрабавалі развесці мяне»: былы кіраўнік Activision Blizzard пра ідэю чаявых для распрацоўшчыкаў гульняў

«Я хацеў бы даць гэтым хлопцам дадатковыя $10-20, бо гэта каштуе даражэй за $70, якія я ўжо заплаціў, і яны не спрабавалі развесці мяне на 5-10 цэнтаў кожную секунду», — так апісаў свой геймерскі вопыт Ібара. Да такіх гульняў ён аднёс Baldur’s Gate 3, Elden Ring, Red Dead Redemption 2, Horizon Zero Dawn і іншыя.

«Гэта той варыянт, які мне часам хацелася б мець у канцы гульняў. Некаторыя гульні асаблівыя», — лічыць ён. Былы топ-менеджар захапіўся адзіночнымі гульнямі і адзначыў першую частку The Last Of Us, а таксама заклікаў Naughty Dog выпусціць The Last Of Us Part 2 на ПК.

Ібара дадаў, што такая ідэя наўрад ці спадабаецца шматлікім геймерам. На яго думку, опцыя чаявых можа азначаць нешта накшталт станоўчага фідбэку: такая практыка не павінна станавіцца чымсьці абавязковым, як у іншых сферах. Карыстальнікі ў каментарах заўважылі, што дадатковыя грашовыя бонусы павінны выдаваць кіраўнікі, у якіх ёсць на гэта сродкі.

Майк Ібара займаў пасаду прэзідэнта кампаніі Blizzard Entertainment ад жніўня 2021 года да студзеня 2024 года. Ён пакінуў кампанію пасля зліцця з Microsoft на фоне масавых звальненняў. Да працы ў студыі ён быў віцэ-прэзідэнтам Xbox.