OpenAI выпусціла GPT-5 Codex: лепшы код-рэвью, менш памылак

GPT-5-Codex ужо разгорнуты ў прадуктах Codex і даступны карыстальнікам ChatGPT Plus, Pro, Business, Edu і Enterprise. У будучыні мадэль плануюць падключыць і да API. Такім чынам, распрацоўшчыкі могуць выкарыстоўваць Codex праз тэрмінал, IDE, GitHub або проста ў ChatGPT.

Паводле дадзеных OpenAI, новая мадэль дэманструе лепшыя вынікі на SWE-bench Verified і пры тэстах па рэфактарынгу кода з буйных рэпазіторыяў, значна пераўзыходзячы базавую GPT-5. Акрамя таго, яе спецыяльна навучалі для код-рэвью: па водгуках дасведчаных інжынераў, GPT-5-Codex выдае менш памылковых каментароў і часцей дае «высокаэфектыўныя» заўвагі.

Адным з ключавых новаўвядзенняў стала функцыя адаптыўнага мыслення: мадэль можа змяніць стратэгію проста ў працэсе выканання задачы. Калі звычайныя маршрутызатары размяркоўваюць вылічальныя рэсурсы загадзя, то GPT-5-Codex здольная «вырашыць на хаду», што спатрэбіцца больш часу, і працягнуць працу. У тэстах яна паспяхова завяршала рэфактарынг, які доўжыўся больш за сем гадзін.

OpenAI падкрэслівае, што Codex выкарыстоўваецца не як замена людзям, а як партнёр па распрацоўцы. Інструмент інтэгруецца ў GitHub і IDE, аўтаматычна правярае pull requests, выяўляе ўразлівасці, запускае тэсты і нават прыкладае скрыншоты інтэрфейсаў. Ужо зараз Codex актыўна ўжываюць інжынеры Duolingo, Virgin Atlantic, Cisco Meraki і іншых кампаній, адзначаючы рост прадукцыйнасці і скарачэнне цыклаў распрацоўкі.

Кампанія таксама абнавіла CLI і IDE-пашырэнні Codex: цяпер яны падтрымліваюць выявы, убудаваныя спісы задач і спрошчаныя рэжымы пацвярджэння. OpenAI адкрыла зыходны код CLI, што дазваляе кампаніям адаптаваць яго пад уласныя працэсы.