Аддзел навін world 8 ліпеня 2025, 11:08

Заснавальнік Twitter стварыў новы месэнджар, які працуе без інтэрнэту і рэгістрацыі

Джэк Дорсі стварыў новы месэнджар — BitChat. Пра навінку ён распавёў у Х, які некалі называўся Twitter.

Аплікацыя працуе без падлучэння да інтэрнэту праз Bluetooth. Яна цалкам дэцэнтралізаваная і працуе без сервернай інфраструктуры — усе паведамленні захоўваюцца толькі ў памяці прылады і абараняюцца скразным шыфраваннем. Рэгістраваць акаўнт і ўводзіць асабістыя дадзеныя, напрыклад нумар тэлефона і электронную пошту, у BitChat не трэба.

my weekend project to learn about bluetooth mesh networks, relays and store and forward models, message encryption models, and a few other things.

bitchat: bluetooth mesh chat…IRC vibes.

TestFlight: https://t.co/P5zRRX0TB3
GitHub: https://t.co/Yphb3Izm0P pic.twitter.com/yxZxiMfMH2
— jack (@jack) July 6, 2025

BitChat пабудаваны на базе тэхналогіі Bluetooth Mesh, якая дазваляе прыладам з Bluetooth аб’ядноўвацца ў сетку. Кожная з іх можа служыць і кліентам, і перадатчыкам, прымаючы і перадаючы паведамленні па метадзе «store and forward»: паведамленні спачатку захоўваюцца на прамежкавай прыладзе і перасылаюцца канчатковаму атрымальніку, калі ён з’явіцца ў сетцы. Гэта дае магчымасць зносіцца падчас збояў у працы інтэрнэту або ў раёнах са слабым сігналам. Дорсі адзначыў, што дадатак нагадвае IRC (Internet Relay Chat) — найстарэйшы тэкставы чат-пратакол з 1990-х.

BitChat даступны ў рэжыме бэта-тэставання. Пакуль ён падтрымлівае толькі тэкст.