«Перапрашыўка ўсяго бізнесу»: генеральны дырэктар Microsoft даў параду кіраўнікам на эпоху ШІ

На канферэнцыі GitHub Universe у аўторак ён сказаў, што кіраўнікам давядзецца адначасова прайсці праз тры трансфармацыі: тэхналагічную, арганізацыйную і пераўтварэнне бізнес-мадэлі — і такога ў галіне яшчэ не было. «Гэта цікавая сітуацыя: змяняецца сама тэхналогія, змяняецца бізнес-мадэль — і, па-трэцяе, цалкам перабудоўваецца працэс стварэння прадукту. Распрацоўка софту літаральна ламаецца і замяняецца на новую», — адзначыў Надэла.

Па яго словах, ключавое ўменне для лідараў сёння — зразумець новы механізм стварэння прадукту: як павінна быць пабудавана праца, калі код, дызайн ці кантэнт ствараюць не толькі людзі, але і ШІ-сістэмы. «Гэта як перапрашыць сябе: забываць старое нашмат цяжэй, чым вучыць новае», — сказаў ён.

Microsoft ужо праходзіла праз буйныя трансфармацыі — напрыклад, калі з’явіўся інтэрнэт, а потым — воблачныя тэхналогіі. Але ШІ, па словах Надэлы, упершыню робіць магчымым софт з нулявым сабекоштам — калі кожны новы фрагмент кода ці кантэнту можна ствараць амаль бясплатна.

Ён правёў паралель з тым, як Microsoft калісьці змяняла звышпрыбытковы сервернны бізнэс на воблачныя сэрвісы. «У нас была мадэль з маржой 98-99%, а з воблакам мы не разумелі, ці ёсць там наогул прыбытак. Але трэба было ісці наперад — і разбірацца па шляху», — успамінае ён. Па яго словах, кампаніі, якія занадта доўга трымаюцца за старыя мадэлі, проста не паспеюць на «іншы бераг».

Надэла раіць успрымаць гнуткасць і здольнасць «развучвацца» як ключавую кампетэнцыю кампаніі. «Вучыцца лёгка. А вось развучвацца і вучыцца нанова — нашмат цяжэй», — паўтарыў генеральны дырэктар. Ён дадаў, што новае пакаленне інжынераў ужо мысліць інакш: яны з самага пачатку кодзяць з дапамогай GitHub Copilot, і гэта становіцца «новай нормай» для ўсёй індустрыі.

Па сутнасці Надэла кажа, што пераможуць тыя, хто здолее перабудаваць свой погляд на распрацоўку, выдаткі і таленты — з нуля, пад рэальнасць эпохі ШІ.