У мінскім Playrix звальненні. Кампанія: часам звальняем «па выніках працы»

Кампанія паведаміла, што «часам вымушаная расставацца з асобнымі супрацоўнікамі па выніках працы», але пра скарачэнні або закрыццё офіса гаворкі няма.

Інфармацыю пра звальненні dev.by пацвердзілі чацвёра былых супрацоўнікаў мінскага офіса Playrix.   

— Скарачэнні пачаліся дзесьці пры канцы мая — у чэрвені. Наколькі ведаю, першапачаткова «паадсявалі» джунаў, потым трохі «прайшліся» па мідлах. Моцных спецаў не чапалі. Хаця цяпер сітуацыя магла змяніцца, — кажа былы супрацоўнік Playrix.  

Дакладную колькасць звольненых ён назваць не змог: 

— Не магу сказаць у працэнтах або лічбах, але, здаецца, вельмі шмат. Пасля майго сыходу (а сышоў я сам, бо не захацеў працаваць з такім падыходам) праз кожныя пару дзён у LinkedIn з’яўляліся былыя супрацоўнікі офіса са статусам «Open to work».

У LinkedIn мы выявілі больш за 10 айцішнікаў, якія пайшлі з мінскага офіса Playrix на працягу вясны і лета. Як мінімум 5 з іх — адразу па выпрабавальным тэрміне.

Па словах айцішніка, маштабныя скарачэнні маглі закрануць увесь Playrix, а не толькі мінскі офіс.  

«Шчыльнасць талентаў»

Іншы былы супрацоўнік Playrix расказвае, што многія звальненні адбываліся ў рамках праграмы «шчыльнасць талентаў»: 

— Пасля пачатку вайны кампанія ўсяляк дапамагала супрацоўнікам. Тут прэтэнзій нуль. Аднак праз некалькі месяцаў у офісе запусцілі працэс, які яны называюць адпаведнасцю «шчыльнасці талентаў». Нібыта ў кампаніі працуюць толькі найлепшыя людзі індустрыі, і калі ты не адпавядаеш чаканням (часцяком відавочна завышаных), цябе пераводзяць на іншы праект або ў «дружалюбную» студыю (тыпу Vizor Games). Калі нідзе не патрэбны спецыяліст твайго профілю — цябе выстаўляюць на вуліцу. Пры гэтым менеджарам рассылалі дакумент, у якім апісвалася, «як зрабіць так, каб не выплачваць супрацоўніку (або выплачваць мінімальна) грошы за скасаванне кантракта». Казалі, што «шчыльнасцю талентаў» кампанія кіравалася заўжды, але насамрэч такога не было раней — прынамсі не ў такіх маштабах.

Яшчэ адна крыніца dev.by пацвердзіла інфармацыю пра звальненні ў рамках «шчыльнасці талентаў» — яго самога звольнілі такім парадкам: 

— Звольнілі праз неадпаведнасць «шчыльнасці талентаў». Якія патрабаванні да талентаў — ніхто не ведае. Так звольнілі чалавек дзесяць за пару тыдняў, але ва ўсёй кампаніі іх было дакладна больш. У мінскім офісе звольнілі многіх. Там цяпер пуста — засталося чалавек 10 (раней у офіс хадзіла чалавек 40). (Гэта візуальная ацэнка суразмоўцы, кампанія не паведамляе пра колькасць звольненых. — Заўв.)   

Паводле слоў былых супрацоўнікаў, апошнімі месяцамі ў мінскім офісе не прапаноўвалі кантрактаў пачаткоўцам па выпрабавальным тэрміне: 

— З сямі пачаткоўцаў выпрабавальны тэрмін не закрыў ніхто. 

Адзін супрацоўнік мінскага офіса Playrix паведаміў, што «сур’ёзных скарачэнняў не заўважыў» і «ў кампаніі ўсё як мае быць з прыбыткам». На яго праекце было толькі адно звальненне за апошні час — «па выніках працы»:  

— Развіталіся на добрай ноце.        

Playrix: Гаворка пра скарачэнні або закрыццё офіса не ідзе

У прэс-службе Playrix сітуацыю пракаментавалі так:

«У Playrix мы заўжды імкнуліся працаваць з наймацнейшымі прафесіяналамі ў індустрыі. Часам мы вымушаныя расставацца з асобнымі супрацоўнікамі па выніках працы, але гаворка пра скарачэнні або закрыццё офіса не ідзе».

Playrix — далёка не адзіная кампанія са сферы мабільнага геймдэву, з якой апошнім часам прыходзяць паведамленні пра сур’ёзныя скарачэнні штату. На пачатку лета стала вядома пра звальненні ў WannaPlay і Playgendary. Ізраільскія СМІ пісалі пра планы Playtika скараціць 250 чалавек.

Пра звальненні ў вашай кампаніі вы можаце паведаміць у наш тэлеграм-бот. Гэта ананімна.