Польшча заклікала грамадзян падумаць, перш чым ехаць у Грузію. Францыя — таксама

«У сувязі са шматлікімі выпадкамі адмовы ва ўездзе ў Грузію замежнікам, у тым ліку грамадзянам краін-членаў ЕС, перад паездкай у Грузію, калі ласка, падумайце, ці ёсць у вашым канкрэтным выпадку фактары, якія павышаюць рызыку адмовы ва ўездзе: гэта можа быць удзел у дэманстрацыях або знаходжанне ў непасрэднай блізкасці ад іх, а таксама пэўная актыўнасць у сацыяльных сетках», — гаворыцца ў заяве пасольства ў Facebook.

Дыпмісія нагадвае, што ўлады Грузіі маюць права ацэньваць фактары рызыкі пры ўездзе замежніка, і адмовіць могуць нават тым, хто мае грузінскі ВНЖ. Асобна падкрэсліваецца, што замежнікі, якія ўдзельнічалі ў акцыях пратэсту, нават меркавана, могуць атрымаць буйныя штрафы, а пры паўторным уездзе ў Грузію з іх запатрабуюць неадкладную аплату гэтых штрафаў. Пратэстныя акцыі праходзяць у краіне з лістапада мінулага года.

Услед за Польшчай сваіх грамадзян пра магчымыя адмовы ва ўездзе ў Грузію за ўдзел у акцыях пратэсту або палітычную актыўнасць у сацсетках папярэдзіла і Францыя, таксама адзначыўшы, што наяўнасць грузінскага віду на жыхарства нічога не гарантуе.

Пасольства Францыі ў Грузіі парэкамендавала сваім грамадзянам устрымацца ад удзелу ў пратэстах і нагадала, што штрафы за іх могуць дасягаць эквіваленту 1,6 тысячы еўра, а пры паўторных парушэннях — суміравацца.